महिनाभरानंतर घरात सनई-चौघडे वाजणार होते, मात्र तत्पूर्वीच नवरदेवाची अंत्ययात्रा निघाली, कारण काय?

अनिल केऱ्हाळे, जळगाव : जळगावातील सिंधी कॉलनीत एक धक्कादायक घटना उघडकीस आली आहे. या घटनेमुळे संपूर्ण जिल्ह्यातच खळबळ उडाली आहे. एक तरुण आपल्या भावी पत्नीसोबत व्हिडिओ कॉलवर बोलत होता. मात्र कॉलवर बोलता बोलता तरुणाने टोकाचे पाऊल उचलले आणि आपली जीवनयात्राच संपवली. तरुणाच्या या निर्णयामुळे कुटुंबीयांना धक्काच बसला. त्याने हे कृत्य का केले? याबाबत अद्याप काहीच कळू शकले नाही. भावी पत्नीसोबत बोलता बोलता असं काय घडलं की तरुणाने थेट आयुष्यच संपवलं, याबाबत पोलीस अधिक तपास करत आहेत. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.

एक महिन्यानंतर तरुणाचे लग्न होणार होते

मयत तरुण हा महाविद्यालयात शिक्षण घेत होता. दोन महिन्यांपूर्वी त्याचा साखरपुडा झाला होता. त्यानंतर पुढच्या महिन्यात 22 मे रोजी त्याचा विवाह होणार होता. घरी लगीनघाई सुरु होती. घरामध्ये लग्न असल्यामुळे सर्वच जण आनंदात होते. घरचे लग्नाच्या तयारीत बिझी होते. शनिवारी रात्री जेवून झाल्यावर तो घराच्या दुसऱ्या मजल्यावर गेला आणि भावी पत्नीसोबत व्हिडिओ कॉलवर बोलत होता.

भावी पत्नीशी व्हिडिओ कॉलवर बोलत असताना जीवन संपवले

भावी पत्नीशी व्हिडिओ कॉलवर बोलत असतानाच त्याने आपले जीवन संपवले. तरुणाच्या आईच्या हा प्रकार लक्षात येताच तिने हंबरडा फोडला. तिचा आवाज ऐकून घरातील इतर सदस्य धावत दुसऱ्या मजल्यावर गेले आणि त्यांनी तरुणाला उचलून तात्काळ जिल्हा शासकीय वैद्यकीय महाविद्यालयात नेले. मात्र डॉक्टरांनी तपासून त्याला मृत घोषित केले. घटनेची माहिती एमआयडीसी पोलिसांनी घटनास्थळी धाव घेतली.

पोलिसात आकस्मात मृत्यूची नोंद

याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. या घटनेमुळे तरुणाच्या कुटुंबीयांवर दुःखाचा डोंगर कोसळला आहे. तरुणाच्या पश्चात आई गुड्डी, वडील गौतम दयाराम बागडे, लहान भाऊ, दोन बहिणी असा परिवार आहे.