दोन दुचाकींची समोरासमोर धडक, दोघा दुचाकीस्वारांचा मृत्यू
अनिल वरुटे यांच्या डोक्याला जोराचा मार लागल्याने ते जागीच ठार झाले. नारायण मडके याला उपचारासाठी स्थानिक नागरिकांनी कोल्हापूर येथील रुग्णालयात दाखल केले असता त्याचा मृत्यू झाल्याचे डॉक्टरांनी सांगितले.
कोल्हापूर / साईनात जाधव (प्रतिनिधी) : दोन दुचाकींची समोरासमोर धडक झाल्याने दोन्ही दुचाकीस्वारांचा मृत्यू झाल्याची दुर्दैवी घटना कोल्हापुरातील सादळे-मादळे घाटात घडली आहे. अनिल बाबुराव वरुटे आणि नारायण तुकाराम मडके अशी अपघातात ठार झालेल्या दुचाकीस्वारांची नावे आहेत. धडक इतकी जोरदार होती की यात मोटारसायकलींचा चक्काचूर झाला. अपघातात एक जण जागीच ठार झाला, तर दुसऱ्याला जखमी अवस्थेत रुग्णालयात नेत असतानाच त्याची प्राणज्योत मालवली.
कासारवाडीतून जात असताना दोन्ही दुचाकींची धडक
करवीर तालुक्यातील सादळे-मादळे येथील सादळे कासारवाडी घाटात ही अपघाताची घटना घडली. कासारवाडीतून जात असताना कुरण माळाजवळ दोन दुचाकींची समोरासमोर धडक झाली. या धडकेत एक जण जागीच ठार झाला. तर दुसरा दुचाकीस्वाराला रुग्णालयात घेऊन जात असताना वाटेतच त्याचा मृत्यू झाला.
अनिल वरुटे हा मजुरीचे काम करतो
अनिल बाबुराव वरुटे हा आपल्या कुटुंबासह सादळे येथील साळुंखे फार्म हाऊसमध्ये मजूर म्हणून काम करतो. सोमवारी सायंकाळी सव्वासात वाजण्याच्या सुमारास आपल्या मोटरसायकलवरून कासारवाडीकडे येत होता.
नारायण मडके हा अपंग व्यक्ती मादळेकडे चालला होता
यावेळी नारायण तुकाराम मडके हा अपंग व्यक्ती आपल्या आपल्या दुचाकीवरून मादळेकडे जात असताना कासारवाडी आणि सादळे येथील कुरण माळाजवळ दोन्ही दुचाकींची समोरासमोर धडक झाली. धडक इतकी जोराची होती की मोटरसायकलचा चुरा झाला होता.
यात अनिल वरुटे यांच्या डोक्याला जोराचा मार लागल्याने ते जागीच ठार झाले. नारायण मडके याला उपचारासाठी स्थानिक नागरिकांनी कोल्हापूर येथील रुग्णालयात दाखल केले असता त्याचा मृत्यू झाल्याचे डॉक्टरांनी सांगितले.
