नको तिथे रील्स बनवण्याची हौस महागात पडली, रील्स बनवताना किव्हा क्रॉसिंग करत होते अन् तितक्यात…
हल्ली सोशल मीडियाचे वेडापायी तरुण जीवघेणी स्टंट करताना दिसत आहेत. या स्टंटबाजीमुळे कधी कधी जीव गमवावा लागतो. मात्र तरीही नको तिथे रील्स बनवण्याचं वेड कमी होताना दिसत नाही.
सुनील जाधव, TV9 मराठी : हल्ली सोशल मीडियावर फेमस होण्यासाठी तरुणाई काय करेल याचा नेम नाही. त्यात रील्स बनवून सोशल मीडियावर अपलोड करणे हा तर तरुणाईचा आवडता दिनक्रम. पण याच वेडापायी नको ते करायला जातात अन् जीव गमावून बसतात. अशीच एक घटना डोंबिवलीत उघडकीस आली आहे. रील्स बनवताना डोंबिवली-ठाकुर्ली दरम्यान रेल्वे अपघातात दोन तरुणांचा दुर्दैवी मृत्यू झाल्याची घटना घडली. रेल्वे रुळांमध्ये मोबाईलवर रील्स बनवताना रेल्वेने उडवले. घटनेची माहिती मिळताच डोंबिवली लोहमार्ग ठाण्याच्या वरिष्ठ पोलीस निरीक्षक अर्चना दुसाने आणि इतर रेल्वे टीमने घटनास्थळी जाऊन पाहणी केली. तरुणांचे मृतदेह शवविच्छेदनासाठी शासकीय रुग्णालयात पाठवण्यात आले. रेल्वे ट्रॅक ओलांडत असताना हा अपघात घडल्याचा अंदाज वर्तवत, पोलीस पुढील तपास करत आहेत.
रेल्वे अपघातांच्या प्रमाणात दिवसेंदिवस वाढ
रेल्वे अपघातात मृत्यूची संख्या मोठ्या प्रमाणात वाढत आहे. यात स्टंटबाजी करणे, रेल्वे ट्रॅक ओलांडताना आणि चालत्या गाडीतून चढताना किंवा उतरताना अनेक प्रवाशांना आपला जीव गमावावा लागत आहे. यासाठी रेल्वे प्रशासन नेहमी आव्हान करून देखील प्रवासी ऐकत नसल्याने अपघात दिवसेंदिवस वाढत चालले आहेत. अशाच प्रकारे सोमवारी सायंकाळी सात ते साडेसातच्या दरम्यान डोंबिवली लोहमार्ग ठाण्याच्या वरिष्ठ पोलिस निरीक्षक अर्चना दुसाने यांना डोंबिवली-ठाकुर्ली दरम्यान दोन तरुणांना रेल्वेने धडक दिल्याची माहिती मिळाली.
रील्स बनवताना रेल्वेने धडक दिली
रील्स बनवताना क्रॉस करताना तरुणांना रेल्वेने धडक दिली. माहिती मिळताच डोंबिवली लोहमार्ग पोलीस आणि रेल्वे पोलीस यांनी घटनास्थळी जाऊन पाहणी केली. या धडकेत या दोन्ही तरुणाचा जागीच मृत्यू झाला होता. पोलिसांनी पंचनामा करत या दोन्ही तरुणाचा मृतदेह ताब्यात घेतले. पोलिसांच्या माहितीनुसार चेतन गोगावले आणि सुयोग उत्तेकर अशी दोघांची नावे आहेत. हे दोघेही डोंबिवली पूर्वेतील रहिवासी आहेत.
