बाबो ही कसली क्रेझ, 24 तासात नवीन गाण्याला 34 लाखांहून अधिक व्ह्यूज, पाहण्यासाठी प्रेक्षकांची प्रचंड गर्दी
आरे बापरे! ही कसली क्रेझ, 19 वर्षांपूर्वीचं गाणं ज्याच्या नवीन व्हर्जनने सोशल मीडियावर घातलाय धुमाकूळ. प्रदर्शित होताच 24 तासांमध्ये या गाण्याला मिळाले 34 लाख व्ह्यूज. पाहण्यासाठी प्रेक्षकांची प्रचंड दर्दी.
संगीताची ताकदच अशी असते की, एखादी जुनी धून ऐकताच आपण क्षणात भूतकाळात पोहोचतो. जुन्या गाण्यांशी जोडलेल्या आठवणी पुन्हा ताज्या होतात आणि मन भावूक होतं. सध्या सोशल मीडियावर अशाच एका जुन्या गाण्याची जोरदार चर्चा सुरू आहे. ‘तेरा मेरा रिश्ता’ या गाण्याच्या नव्या 2.0 व्हर्जनने 2000च्या दशकातील अनेकांच्या आठवणींना उजाळा दिला आहे.
2007 मध्ये प्रदर्शित झालेल्या एका लोकप्रिय क्राइम-ड्रामा चित्रपटातील हे गाणं त्यावेळी प्रचंड गाजले होते. चित्रपटातील कलाकारांच्या अभिनयासोबतच त्यातील गाण्यांनीही प्रेक्षकांच्या मनावर वेगळी छाप पाडली होती. विशेषतः ‘तेरा मेरा रिश्ता’ हे गाणं त्या काळातील तरुणाईच्या आवडत्या गाण्यांपैकी एक बनले होते.
प्रीतम यांच्या संगीताने गाजलेलं गाणं
या गाण्याचे मूळ संगीत प्रसिद्ध संगीतकार प्रीतम यांनी दिले होते, तर हृदयस्पर्शी गीतलेखन सईद कादरी यांनी केले होते. पाकिस्तानी गायक मुस्तफा जाहिद यांच्या आवाजाने या गाण्याला एक वेगळीच ओळख मिळाली.
आता तब्बल 19 वर्षांनंतर या गाण्याचे ‘तेरा मेरा रिश्ता 2.0’ हे नवे रीक्रिएटेड व्हर्जन प्रेक्षकांच्या भेटीला आले आहे. मात्र, या नव्या आवृत्तीत मूळ गाण्यापेक्षा अनेक बदल करण्यात आले आहेत.
यावेळी संगीतकार मिथुन यांनी नव्या गाण्याचे संगीत तयार केले आहे. गीत मात्र पुन्हा एकदा सईद कादरी यांनीच लिहिले आहे. या नव्या आवृत्तीला साज भट्ट आणि सुबोध शर्मा यांनी आवाज दिला आहे. त्यांच्या आवाजातूनही मूळ गाण्यातील भावनिकता आणि विरहाची भावना जाणवते.
विशेष म्हणजे, नव्या व्हर्जनमध्ये मूळ गाण्याचे संगीतकार प्रीतम आणि गायक मुस्तफा जाहिद यांना योग्य श्रेय देण्यात आले आहे. त्यामुळे जुन्या गाण्याची आठवण आणि नव्या संगीताचा ताजेपणा यांचा सुंदर मेळ या गाण्यात पाहायला मिळतो.
View this post on Instagram
24 तासांत 34 लाखांहून अधिक व्ह्यूज
गाणं रिलीज होताच सोशल मीडियावर त्याची मोठ्या प्रमाणात चर्चा सुरू झाली. यूट्यूबवर अवघ्या 24 तासांत या गाण्याने 34 लाखांहून अधिक व्ह्यूज मिळवल्याचे सांगितले जात आहे. हा आकडा सातत्याने वाढत आहे.
गाण्यावर चाहते भरभरून प्रतिक्रिया देत असून, अनेकजण हे गाणं पुन्हा पुन्हा ऐकत असल्याचे सांगत आहेत. काही चाहत्यांच्या मते, हे गाणं ऐकताच त्यांना 2000च्या दशकातील जुन्या आठवणी पुन्हा आठवतात.
