क्राइम पेट्रोलच्या या भागाला प्रेक्षकांची सर्वात जास्त पसंती, मिळाले 231 मिलियन व्ह्यूज, फ्रीमध्ये पाहण्यासाठी प्रचंड गर्दी
ना चित्रपट, ना वेब सीरिज, क्राइम पेट्रोलच्या या भागाला मिळाले 231 मिलियनपेक्षा जास्त व्ह्यूज. YouTube वर या भागाची होतेय प्रचंड चर्चा. कथा ठरतेय सुपरहिट.
‘क्राइम पेट्रोल डायल 100’च्या पहिल्या सीझनमधील 25वा भाग असलेल्या ‘दांव-पेच’चे प्रसारण 23 नोव्हेंबर 2015 रोजी झाले होते. सुमारे 42 मिनिटांच्या या एपिसोडमध्ये प्रेम, फसवणूक, लालसा आणि हत्येच्या कटाभोवती फिरणारी रहस्यमय कथा दाखवण्यात आली आहे.
कथेच्या केंद्रस्थानी गोखले नावाचा यशस्वी फौजदारी वकील आहे. त्याच्या वैयक्तिक आयुष्यात एक मोठे गुपित दडलेले असते. तसेच त्याचे स्वतःच्या सेक्रेटरीसोबत विवाहबाह्य संबंध असल्याचेही समोर येते. याच नात्यामुळे पुढे कथेला धक्कादायक वळण मिळते.
या भागाची कथा काय?
गोखले यांच्यावर जीवघेणा हल्ला करण्याचा प्रयत्न केला जातो. मात्र हल्लेखोराची गोळी गोखले यांना न लागता एका महिला आणि तिच्या चार वर्षांच्या मुलीला लागते. या घटनेत दोघींचा मृत्यू होतो. त्यानंतर पोलिसांसमोर गोखले यांना मारण्याचा प्रयत्न नेमका कोणी केला, हा मोठा प्रश्न उभा राहतो. तपास जसजसा पुढे जातो, तसतसे गोखले यांच्या खासगी आयुष्यातील अनेक धक्कादायक रहस्ये उघड होऊ लागतात.
या एपिसोडची खासियत म्हणजे संपूर्ण कथा एका भागातच पूर्ण होते. आज या एपिसोडला मिळालेली डिजिटल लोकप्रियता ही त्याची सर्वात मोठी कामगिरी मानली जात आहे. SonyLIV वरही ‘दांव-पेच’चा अधिकृत एपिसोड उपलब्ध आहे.
23 कोटींहून अधिक व्ह्यूज
दरम्यान, 2003 मध्ये सुरू झालेल्या ‘क्राइम पेट्रोल’ या शोने भारतीय टेलिव्हिजनवरील क्राइम स्टोरी सांगण्याची पद्धतच बदलली. 9 मे 2003 रोजी सोनी एंटरटेनमेंट टेलिव्हिजनवर या शोची सुरुवात झाली. सुभ्रमण्यम एस. अय्यर यांनी या शोची निर्मिती केली होती. भारतातील वास्तविक गुन्हेगारी घटनांवर आधारित कथा नाट्यमय पद्धतीने सादर करणे ही या शोची प्रमुख ओळख ठरली.
जुन्या एपिसोडला मिळालेला 23 कोटींहून अधिक व्ह्यूजचा प्रतिसाद पाहता, रहस्यमय आणि गुंतागुंतीच्या गुन्हेगारी कथांबद्दल प्रेक्षकांची उत्सुकता आजही कायम असल्याचे स्पष्ट होते.
