रुसलेल्या बॉयफ्रेंडला मनवण्यासाठी सर्वात सुंदर गाणं, 34 वर्षांपासून लोकप्रिय, ऐकताच जातो रुसवा

90 चं दशक बॉलिवूडमधील रोमँटिक गाण्यांसाठी खास ओळखलं जातं. या काळात अनेक अशी गाणी तयार झाली, जी आजही प्रेक्षकांच्या मनावर अधिराज्य गाजवतात. गायक उदित नारायण यांच्या सुमधुर आवाजातील असंच एक लोकप्रिय गाणं म्हणजे ‘मेरे दिल को करार आ जाए’. 1992 मध्ये प्रदर्शित झालेल्या ‘जिगर’ या चित्रपटातील हे गाणं आजही प्रेमीयुगुलांच्या पसंतीस उतरलं आहे.

‘मेरे दिल को करार आ जाए’ या रोमँटिक गाण्यात अभिनेता अजय देवगण आणि अभिनेत्री करिश्मा कपूर यांची जोडी पाहायला मिळाली होती. गाण्यातील दोघांची केमिस्ट्री आणि प्रेम व्यक्त करण्याची सुंदर शैली प्रेक्षकांना भावली. रुसलेल्या प्रियकराची समजूत काढताना आपल्या प्रेमाची भावना व्यक्त करणाऱ्या या गाण्याने अनेकांच्या मनात खास स्थान निर्माण केलं. अजय देवगण आणि करिश्मा कपूर यांनी त्या काळात अनेक चित्रपटांमध्ये एकत्र काम केलं होतं.

उदित नारायण आणि साधना सरगम यांच्या आवाजाची जादू

या गाण्याला उदित नारायण आणि साधना सरगम यांनी आपला सुरेल आवाज दिला आहे. संगीतकार आनंद-मिलिंद यांच्या संगीताने गाण्याला रोमँटिक साज चढवला तर गीतकार समीर यांच्या शब्दांनी प्रेमातील हळुवार भावना सुंदरपणे मांडल्या. गाण्याचं संगीत आणि गायकांचे सूर यांमुळे हे गाणं आजही जुन्या हिंदी गाण्यांच्या चाहत्यांसाठी खास आहे.

‘जिगर’ चित्रपट ठरला होता हिट

‘जिगर’ हा चित्रपट 1992 मध्ये दिवाळीच्या काळात प्रदर्शित झाला होता. फरोग सिद्दीकी यांनी या चित्रपटाचं दिग्दर्शन केलं होतं. अजय देवगणच्या कारकिर्दीतील सुरुवातीच्या चित्रपटांपैकी हा एक महत्त्वाचा चित्रपट मानला जातो. मार्शल आर्ट्स आणि अ‍ॅक्शनचा समावेश असलेल्या या चित्रपटाला प्रेक्षकांचा चांगला प्रतिसाद मिळाला होता.

आज चित्रपटाला 34 वर्षे झाली असली तरी ‘मेरे दिल को करार आ जाए’ या गाण्याची लोकप्रियता आजही चाहत्यांमध्ये कायम आहे. जुन्या गाण्यांची आठवण काढताना हे रोमँटिक गाणं आजही अनेकांच्या ओठांवर येतं आणि 90 च्या दशकातील प्रेमळ आठवणींना उजाळा देतं.