मालिकेच्या प्रोमोला अवघ्या काही तासांत लाखो व्ह्यूज; सेलिब्रिटींकडूनही प्रतिक्रिया, तुफान हिट!
'आनंदी' ही नवी मालिका लवकरच प्रेक्षकांच्या भेटीला येणार असून त्याचा प्रोमो नुकताच सोशल मीडियावर शेअर करण्यात आला. या प्रोमोला अवघ्या काही तासांत लाखो व्ह्यूज मिळाले आहेत. या मालिकेविषयी प्रेक्षकांमध्ये प्रचंड उत्सुकता आहे.
2026 या नवीन वर्षाच्या सुरुवातीला छोट्या पडद्यावर अनेक नवीन मालिका प्रेक्षकांच्या भेटीला आल्या. त्यात आता आणखी एका नव्या मालिकेची भर पडणार आहे. हृदयाला भिडणाऱ्या कथेसह ही मालिका छोट्या पडद्यावर येण्यास सज्ज झाली आहे. येत्या 16 मार्चपासून स्टार प्रवाह वाहिनीवर ‘आनंदी’ ही नवी मालिका सुरू होतेय. मालिकेच्या शीर्षकाला साजेशी अशीच या मालिकेची गोष्ट आहे. ही कथा आहे आनंदीची. एका अपघातात दृष्टी गमावलेल्या, पण तरीही जीवनाकडे अत्यंत सकारात्मक दृष्टिकोनाने पाहणाऱ्या तरुणीची. डोळ्यांनी जग दिसत नसलं, तरी मनाने आणि संवेदनांनी आनंदी संपूर्ण जग अनुभवते. तिचं अंधत्व हा तिचा दुबळेपणा नसून तिची सगळ्यात मोठी ताकद आहे. इतरांना सहज न सापडणाऱ्या गोष्टी आनंदी सहज ओळखते. ती अत्यंत संवेदनशील असून गरजूंना मदत करणं हा तिच्या स्वभावाचा अविभाज्य भाग आहे. कधी कधी आपले डोळे आपल्याला फसवू शकतात, पण मन कधीच नाही हा आनंदीचा जीवनमंत्र आहे. जगण्याचा भरभरून आनंद घेणारी आनंदी म्हणूनच इतरांपेक्षा वेगळी ठरते.
या मालिकेतून नवोदित अभिनेत्री जाई खांडेकर मालिका विश्वात पदार्पण करत आहे. आजवर अनेक नाटकांच्या माध्यमातून अभिनय, दिग्दर्शन आणि लेखिका अशी तिहेरी भूमिका पार पाडलेल्या जाईसाठी ‘आनंदी’ ही भूमिका एक नवा आणि आव्हानात्मक अनुभव आहे. या भूमिकेविषयी सांगताना जाई खांडेकर म्हणाली, “आनंदी नावाप्रमाणेच आनंदी स्वभावाची मुलगी आहे. ही फक्त एक भूमिका नाही, तर ती एक भावना आहे. डोळ्यांनी दिसत नसलेल्या गोष्टी आनंदी मनाने अनुभवते आणि तिच तिची खरी ताकद आहे. ही भूमिका साकारणं माझ्यासाठी खूप मोठा सन्मान आणि जबाबदारी आहे. या भूमिकेसाठी आम्ही एका अंध मुलांच्या संस्थेत जवळपास आठवड्याभराचं वर्कशॉप केलं. या मुलांच्या दैनंदिन आयुष्यातल्या गोष्टी खूप जवळून अनुभवता आल्या. प्रेक्षकांना आनंदी नक्कीच आपलीशी वाटेल असा मला विश्वास आहे.’
या मालिकेच्या प्रोमोनं सोशल मीडियावर येताच एक नवा विक्रम रचला आहे. ‘आनंदी’च्या प्रोमोला अवघ्या काही तासांत दोन दशलक्षांहून अधिक व्ह्यूज मिळाले आहेत. या प्रोमोवर नेटकऱ्यांनी विविध प्रतिक्रिया दिल्या आहेत. या प्रोमोवर अमित भानुशाली, रुपाली भोसले, प्रतीक्षा मुणगेकर, अभिषेक रहाळकर, रेश्मा शिंदे, भाग्यश्री जोईल, ऋतुजा बागवे यांसारख्या सेलिब्रिटींनीही कमेंट्स करत आनंद व्यक्त केला आहे.
