Amitabh Bachchan : सैफसमोर अमिताभ बच्चन यांचा मजेशीर सवाल; करीना मला काय म्हणेल? पुढे जे झालं ते भन्नाट!
अमिताभ बच्चन यांनी 'कौन बनेगा करोडपती 18' मध्ये अभिनेता सैफ अली खानसोबतच्या कौटुंबिक नात्याचा रंजक खुलासा केला. या नात्याची वीण थेट राज कपूर यांच्यापर्यंत कशी पोहोचते, हे बिग बींनी उलगडून दाखवलं. तसेच करीना कपूरशी असलेल्या नात्यावरही मजेशीर प्रश्न विचारला.
बॉलिवूडचे शहेनशाह अर्थात अमिताभ बच्चन (Amitabh Bachchan) यांचा ‘कौन बनेगा करोडपती 18’ हा क्विझ शो सध्या बऱ्याच चर्चेत आहे. या शोमध्ये बिग बी लोकांना फक्त कोट्याधीश होण्याची, पैसे जिंकण्याचीच संधी देत नाहीत तर स्पर्धकांशी आणि प्रेक्षकांशी ते दिलखुलासपणे संवाद साधतात. मोकळपणाने गप्पा मारत अमिताभ हे अनेकदा त्यांच्या आयुष्याशी निगडीत काही गोष्टी, काही किस्से सांगत असतात. नुकताच त्यांनी एक रंजक खुलासा केला आणि तोही अभिनेता सैफ अली खान (Saif Ali Khan) याच्याशी असलेल्या फॅमिली रिलेशनबद्दल. खरंतर ‘हैवान’ चित्रपटाच्या प्रमोशनसाठी अभिनेता अक्षय कुमार (Akshay Kumar) आणि सैफ अली खान हे दोघे KBC 18 मध्ये आले होते. अमिताभ यांनी दोघांनाही हॉटसीटवर बसवलं आणि गेम खेळता खेळताच त्यांनी फॅमिली कनेक्शनचाही उलगडा केला.
गप्पा मारता मारता अमिताभ बच्चन यांनी प्रेक्षकांना सांगितलं की, त्यांचं कुटुंब हे सैफ अली खानच्या कुटुंबाशी नात्यात आहे. विशेष म्हणजे, या नात्याची वीण थेट प्रसिद्ध अभिनेते राज कपूर यांच्यापर्यंत जाऊन पोहोचते. त्यांचं नातं कसं, हेही बिग बी यांनी उलगडून सांगितलं.
अमिताभ यांनी केला नात्याचा उलगडा
‘ बऱ्याच लोकांना हे माहीत नसेल की हे (सैफ अली खान) आमचे नातेवाईक आहेत. ज्येष्ठ (दिवंगत) अभिनेते राज कपूरजी यांची मुलगी, रितू नंदा यांच्या मुलाशी, निखिल नंदा यांच्याशी माझ्या लेकीचं (श्वेताचं) लग्न झालं आहे ‘ असं अमिताभ बच्चन म्हणाले. त्यानंतर गंमती-जमतीत त्यांनी हा संवाद आणखी पुढे नेला आणि सैफ अली खानची पत्नी आणि अभिनेत्री करीना कपूर खानचा उल्लेख केला. करीना ही राज कपूर यांची नात आहे.
करीनाला मी काय म्हणू ?
पुढे अमिताभ यांनी मजेतच सैफला विचारलं की त्यांच्या कुटुंबातील गुंतागुंतीची नाती पाहता करीना त्यांना नेमकं कोणत्या नात्याने हाक मारणार ? ते म्हणाले, ‘ मला जाणून घ्यायचंय की मी करीनाला काय म्हणू? करीना मला काय हाक मारेल ?’ असा मजेशीर सवालही त्यांनी विचारला. मात्र त्याचं काही उत्तर देण्याआधीच सैफला हसू अनावर झालं आणि तो जोरजोरात हसू लागला. पुढे तोही मजेत म्हणाला, ‘बरं झालं हा काही या गेममधला प्रश्न नाहीये.’ त्याचा हा हजरजबाबीपणा पाहून प्रेक्षकही हसू लागले.
अमिताभ यांच्या मुलाशी होणार होतं करीनाच्या बहिणीचं लग्न
करीना कपूर हिची मोठी बहीण, अर्थात अभिनेत्री करीश्मा कपूर सर्वांनाच माहीत असेल. तर करीश्मा आणि अमिताभ बच्चन यांचा मुलगा, अभिषेक बच्चन या दोघांचं लग्न होणार होतं, त्यांचा साखरपुडाही झाला होता. मात्र काही कारणांमुळे त्यांचं ठरलेलं लग्न मोडलं. नंतर करिश्माने संजय कपूरशी लग्न केलं तर अभिषेक आणि अभिनेत्री ऐश्वर्या राय यांचं लग्न झालं.
दरम्यान अमिताभ बच्चन आणि सैफ अली खान हे दोघेही ‘एकलव्य’ आणि ‘आरक्षण’ या दोन चित्रपटांत एकत्र झळकले होते. तर करीना आणि करिश्मा कपूर यांच्यासोबतही अमिताभ बच्चन यांनी काही चित्रपटांत काम केलं आहे.
