वहिनीसाहेब खूपच तापट.. भारत-पाकिस्तान मॅचदरम्यान अनुष्काच्या ‘त्या’ व्हिडीओवर प्रतिक्रिया
भारत-पाकिस्तान सामनादरम्यानचा अभिनेत्री अनुष्का शर्माचा एक व्हिडीओ सध्या सोशल मीडियावर व्हायरल होत आहे. या व्हिडीओमध्ये ती एका व्यक्तीवर चिडताना दिसून येत आहे. अनुष्काचा राग अनावर का झाला, असा प्रश्न नेटकरी हा व्हिडीओ पाहिल्यानंतर विचारत आहेत.
न्यूयॉर्कच्या नासाऊ काऊंटी क्रिकेट स्टेडियममधील अभिनेत्री अनुष्का शर्माचा ‘क्युट’ व्हिडीओ व्हायरल झाल्यानंतर आता तिचा एक नवीन व्हिडीओ समोर आला आहे. पती विराट कोहलीला पाठिंबा देण्यासाठी पोहोचलेली अनुष्का या व्हिडीओमध्ये एका व्यक्तीसोबत अत्यंत रागात बोलताना दिसत आहे. नेमकं असं काय घडलं, ज्यामुळे अनुष्काचा राग अनावर झाला, हे मात्र अद्याप स्पष्ट होऊ शकलं नाही. मात्र या व्हिडीओमध्ये तिच्या चेहऱ्यावर स्पष्ट राग दिसून येतोय. तिचा हा व्हिडीओ सोशल मीडियावर व्हायरल होत असून त्यावर नेटकऱ्यांकडून विविध प्रतिक्रिया येत आहेत.
स्टेडियमच्या एका स्टँडवर उभी असलेली अनुष्का तिच्यासमोर असलेल्या व्यक्तीसोबत अत्यंत रागात बोलताना दिसतेय. तिच्या चेहऱ्यावर भावना पाहून नेटकरी संभ्रमात पडले आहेत. “वहिनी फारचा तापट होत आहेत”, असं एकाने लिहिलं. तर ”कोहलीचं संपूर्ण कुटुंबच आक्रमक स्वभावाचं आहे”, असं दुसऱ्याने म्हटलंय. काहींनी अनुष्काचीही बाजू घेतली आहे. ‘माणूस आनंदी आणि रागीट असू शकतो.. आपण सर्वजण असेच आहोत, यात अशी कोणती मोठी गोष्ट आहे’, असा सवाल एका युजरने केला.
पहा व्हिडीओ
9 जून रोजी झालेल्या टी-20 विश्वचषकाच्या सामन्यात भारताने पाकिस्तानला हरवलं होतं. या सामन्यानंतर अनुष्का रोहित शर्माची पत्नी रितिका सजदेह आणि युझवेंद्र चहलची पत्नी धनश्री यांच्यासोबत ग्रुप फोटोमध्ये दिसली. धनश्रीने तिच्या इन्स्टाग्राम स्टोरीमध्ये हा फोटो पोस्ट केला होता. या सामन्यात जेव्हा विराट फक्त चार धावा करून बाद झाला, तेव्हा तिच्या चेहऱ्यावर निराशा स्पष्टपणे दिसून आली. मात्र भारताच्या विजयाचा आनंद तिने सामन्याअखेर साजरा केला.
अनुष्का आणि विराट यांनी 2017 मध्ये लग्नगाठ बांधली. त्यानंतर 2021 मध्ये अनुष्काने मुलगी वामिकाला जन्म दिला. यावर्षी फेब्रुवारी महिन्यात तिने मुलाला जन्म दिला. त्याचं नाव त्यांनी अकाय असं ठेवलंय. अनुष्काने अभिनयक्षेत्रातून काही काळ ब्रेक घेतला आहे. मात्र तिचा ‘चकदा एक्स्प्रेस’ या चित्रपटाचं शूटिंग पूर्ण झालं असून तो लवकरच प्रेक्षकांच्या भेटीला येणार आहे. प्रोसिज रॉय दिग्दर्शित या चित्रपटात अनुष्काने खेळाडूची भूमिका साकारली आहे.
