Bigg Boss 20: गुल्लूचा मोठा खुलासा, अवघ्या 5 महिन्यांत पत्नीसोबत घटस्फोट; कुटुंबानेही सोडली साथ

कुशल तन्वर उर्फ गुल्लू

Bigg Boss 20: ‘बिग बॉस 20’च्या घरात सध्या स्पर्धकांच्या खेळासोबतच त्यांच्या वैयक्तिक आयुष्याचे किस्सेही समोर येत आहेत. अभिनेता आणि रिअॅलिटी शो स्टार कुशल तंवर ऊर्फ गुल्लू याने नुकताच त्याच्या आयुष्यातील एक मोठा आणि आजवर लपवून ठेवलेला प्रसंग उघड केला. मी विवाहित होतो आणि अवघ्या चार ते पाच महिन्यांतच लग्नाचा शेवट घटस्फोटात झाला, असा खुलासा गुल्लूने केला आहे. 2024 मध्ये त्यांचा घटस्फोट झाला. बिग बॉसच्या घरात गुल्लूने काजी तौकीरसोबत मनमोकळा संवाद साधला. आपल्या आयुष्यातील एका कठीण काळाबद्दल बोलताना त्याने हा खुलासा केला. हा फक्त ब्रेकअप किंवा साधा हार्टब्रेक नव्हता, तर आपण घटस्फोटातून गेलो होतो, असं त्याने स्पष्ट केलं. गुल्लूने सांगितलं की, त्याचं लग्न केवळ साडेचार ते पाच महिने टिकलं आणि 2024 मध्ये घटस्फोट झाला.

गुल्लूचा हा खुलासा ऐकून काजीही काही काळासाठी आश्चर्यचकित झाला. कारण यापूर्वी गुल्लूच्या लग्नाबाबत फारशी अधिकृत माहिती समोर आली नव्हती. रिअॅलिटी शोमध्ये सक्रिय असताना त्याच्या लग्नाचे काही फोटो सोशल मीडियावर व्हायरल झाले होते. त्यावेळी या फोटोंबाबत वेगवेगळ्या चर्चा रंगल्या होत्या. आता बिग बॉसच्या घरातील गुल्लूच्या वक्तव्यानंतर त्या जुन्या फोटोंची पुन्हा चर्चा सुरू झाली आहे.

पहा व्हिडीओ-

#Gullu ne #Qazi se share kiya apni shaadi ka secret!

Dekhiye #BiggBoss20 ka naya episode, har roz raat 9 baje #JioHotstar par aur 10:30 baje #ColorsTV par.#BiggBoss20 #BiggBossOnJioHotstar pic.twitter.com/Rq1Ohv5Aon

— JioHotstar Reality (@HotstarReality) September 22, 2026

गुल्लूने त्याच्या लग्नामागील परिस्थितीवरही भाष्य केलं. त्याच्या कुटुंबात कमी वयात लग्न करण्याचा दबाव असतो, असं त्याने सांगितलं. कुटुंबाच्या दबावामुळे त्याने लग्न करण्याचा निर्णय घेतला होता. मात्र, लग्नानंतर परिस्थिती सुरळीत झाली नाही. नातं टिकवण्यासाठी त्याने प्रयत्न केले, पण शेवटी हे नातं पुढे नेणं शक्य नसल्याचं त्याला जाणवलं. घटस्फोटाचा निर्णय घेतल्यानंतर त्याच्या कुटुंबातील काही सदस्य त्याच्याविरोधात गेले. गुल्लूने सांगितलं की, या काळात कुटुंबीयांनी त्याच्याशी बोलणंही बंद केलं होतं. घटस्फोटाची प्रक्रिया जवळपास वर्षभर सुरू होती आणि या संपूर्ण काळाचा त्याच्यावर परिणाम झाला, असं त्याने सांगितलं.

दुसरीकडे ‘बिग बॉस 20’च्या घरात दररोज नवनवीन ट्विस्ट पाहायला मिळत आहेत. 22 सप्टेंबरच्या एपिसोडमध्ये घरातील वातावरण राशन टास्कमुळे चांगलंच तापलं. एका बाजूला स्पर्धकांमध्ये रँकिंगवरून वाद झाले, तर दुसरीकडे या टास्कनंतर ईशा रिखी भावूक होऊन ढसाढसा रडताना दिसली. याच एपिसोडमध्ये गुल्लूने त्याच्या वैयक्तिक आयुष्याबाबत मोठा केला. तर घरातील रँकिंगचा थेट परिणाम संपूर्ण घराच्या राशनवर झाला. कनिकाच्या अंतिम रँकिंगनुसार घरातील सदस्यांची एकूण कामगिरी 10 पैकी 6 इतकी ठरली. त्यामुळे ‘बिग बॉस’ने घरच्यांना पुढील संपूर्ण आठवड्यासाठी फक्त 60 टक्के साप्ताहिक राशन मिळणार असल्याचं जाहीर केलं. यामुळे स्पर्धकांच्या अडचणी वाढण्याची शक्यता आहे.