Suraj Chavan Daughter Photo: सूरज चव्हाणच्या लेकीला पाहिलेत का? आत्या जान्हवी किल्लेकरने शेअर केला खास व्हिडीओ

‘बिग बॉस मराठी’च्या पाचव्या पर्वाचा विजेता सूरज चव्हाणच्या घरी चिमुकल्या पाहुणीचे आगमन झाले असून घरात आनंदाचे वातावरण पाहायला मिळत आहे. ‘गुलिगत स्टार’ सूरज चव्हाण आणि त्यांची पत्नी संजना चव्हाण यांना कन्यारत्न झाले आहे. जन्माष्टमीच्या शुभमुहूर्तावर सूरज बाप झाला आहे. ही बातमी सोशल मीडियावर वाऱ्यासारखी पसरली आणि चाहत्यांकडून सूरज व संजना यांना शुभेच्छांचा वर्षाव झाला.

सूरजच्या घरी चिमुकलीचे आगमन

लग्नानंतर अवघ्या नऊ महिन्यांनी सूरज आणि संजना यांच्या आयुष्यात हा आनंदाचा क्षण आला असून दोघेही आई-बाबा झाले आहेत. बाबा झाल्यानंतर सूरजचा आनंद गगनात मावेनासा झाला आहे. लेकीच्या जन्मानंतरचा त्यांचा रुग्णालयातील पहिला व्हिडिओ समोर आला आहे. एका फॅनने रुग्णालयातून शेअर केलेल्या या व्हिडिओमध्ये सूरज आणि संजनाच्या बाळाला पाहण्यासाठी स्टाफ व चाहत्यांनी गर्दी केलेली दिसते. गर्दीतून वाट काढत सूरज संजना आणि बाळाला भेटला. मात्र या व्हिडिओमध्ये सूरजच्या लग्नापासून ते संजनाच्या डोहाळे जेवणापर्यंत हक्काने मिरवणारी त्यांची सेलिब्रिटी बहीण जान्हवी किल्लेकर दिसली नव्हती. त्यामुळे चाहत्यांनी कमेंट्समध्ये ‘आत्याबाई कुठे आहेत?’ असे प्रश्न विचारले होते.

View this post on Instagram

A post shared by Jahnavi Kiran Killekar (@jahnavikillekar)

जान्हवीने शेअर केला व्हिडीओ

आता मात्र जान्हवीने वेळ काढून रुग्णालयात पोहोचून संजना आणि सूरजच्या बाळाला भेट दिली आहे. यावेळी जान्हवी काहीशी भावूक झाल्याचेही दिसून आले. मराठी अभिनेत्री जान्हवी किल्लेकरने तिच्या अधिकृत इन्स्टाग्राम अकाउंटवरून एक व्हिडीओ पोस्ट केला आहे. यात जान्हवी खूप खूश दिसते. आपल्या लाडक्या भावाच्या आयुष्यात आलेल्या या आनंदाच्या क्षणाचा गोडवा तिच्या चेहऱ्यावर स्पष्ट दिसतो. जान्हवी गाडीतून उतरून थेट सूरज-संजनाच्या बाळाच्या वॉर्डकडे धावत जाते. तिथे संजना भेटते. जान्हवी तिला कडकडून मिठी मारते आणि मग बाळाला भेटण्यासाठी जाते. जान्हवी बाळाला हातात घेते आणि डोळेभरून पाहते. त्यावेळी तिच्या डोळ्यात आनंदाश्रू पाहायला मिळाले. जान्हवी संपूर्ण रुग्णालयात बर्फी वाटते. संपूर्ण व्हिडिओमध्ये सूरज मात्र दिसला नाही.