आंदोलनात सहभागी होण्यासाठी सेलिब्रिटींना देतायत पैसे; अभिनेत्रीचा धक्कादायक खुलासा

बिग बॉस ओटीटी फेम अभिनेत्री आकांक्षा पुरीने विद्यार्थ्यांच्या आंदोलनाबद्दल धक्कादायक खुलासा केला आहे. इंडस्ट्रीतील लोकांना आंदोलनात सहभागी होण्याच्या बदल्यात पैशांची ऑफर दिली जात आहे, असं तिने म्हटलंय. नीट पेपरफुटीप्रकरणी केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी दिल्लीतल्या जंतर मंतर याठिकाणी कॉकरोच जनता पार्टीच्या नेतृत्वाखाली विद्यार्थ्यांचं आंदोलन सुरू आहे. या आंदोलनाची धग आता संपूर्ण देशभरात पसरली असून विविध राज्यांमधील तरुणही रस्त्यावर उतरले आहेत. या आंदोलनात सेलिब्रिटीसुद्धा सहभागी होत आहेत.

काय म्हणाली आकांक्षा?

‘आयएनएस’ला दिलेल्या मुलाखतीत आकांक्षा पुरी म्हणाली, “लोकांनी योग्य गोष्टींची साथ द्यावी, इतकंच मला वाटतं. याचं मार्केटिंग करू नये, त्यातून पैसे कमावू नये. या आंदोलनातून स्वत:ची पोळी भाजू नका. योग्य लोकांची साथ द्या. यापेक्षा अधिक मोकळेपणे मी काय बोलू? मला असं वाटतं, जे लोक माझ्यासोबत आहेत.. अभिनेते, कंटेंट क्रिएटर्स.. त्या सर्वांना माहीत आहे की अनेक लोक आणि पक्ष आमच्याशी संपर्क साधत आहेत. याचं मार्केटिंग करू पाहत आहेत.”

सेलिब्रिटींना पैशांची ऑफर

“मला या कचऱ्याचा भाग बनायचं नाहीये. मला योग्य गोष्टींची साथ द्यायची आहे आणि त्यामुळेच मी तिथे आहे की नाही याने काही फरक पडत नाही. जेव्हा कधी कोणाला गरज असते, तेव्हा मी त्यांच्यासोबत उभी असते. मला विद्यार्थ्यांबद्दल खूप वाईट वाटतंय, कारण ते भारताचं भविष्य आहेत. विद्यार्थ्यांवर लाठीचार्जचे व्हिडीओ पाहून मी खूप अस्वस्थ झाले. त्यामुळे सरकारने त्यांचं बोलणं ऐकून घ्यावं, असं मला वाटतं.”

18 जुलै रोजी सकाळी दिल्ली पोलिसांनी शास्त्रज्ञ आणि सामाजिक कार्यकर्ते सोनम वांगचूक यांना जंतर मंतर इथल्या आंदोलनस्थळावरून बळजबरीने हटवलं. दिल्ली उच्च न्यायालयाच्या आदेशानुसार आणि वैद्यकिय सल्ल्यामुळे अधिकाऱ्यांनी त्यांना रुग्णालयात दाखल केलं. त्यानंतर सोमवारी सीजेपीच्या नेतृत्वाखाली विद्यार्थ्यांनी थेट संसद भवनावर धडक मोर्चा काढला. यावेळी दिल्ली पोलिसांनी आंदोलकांवर लाठीचार्ज केला. या लाठीचार्जचा अनेक सेलिब्रिटींनी निषेध व्यक्त केला आहे.