‘देवमाणसाची सटकली की काय?’, अजय देवगणने चक्क शेअर केला मराठी सिनेमाचा ट्रेलर, तुम्ही पाहिलात का?
बॉलिवूड अभिनेता अजय देवगणने नुकताच त्याच्या सोशल मीडिया अकाऊंटवर 'देवमाणूस' सिनेमाचा ट्रेलर शेअर केला आहे. हा ट्रेलर तुम्ही पाहिला का?
नुकत्याच प्रदर्शित झालेल्या तेजस देऊस्कर दिग्दर्शित ‘देवमाणूस’ चित्रपटाच्या ट्रेलरला प्रेक्षकांचा भरभरून प्रतिसाद मिळत आहे. मराठी सिनेसृष्टीतूनही या ट्रेलरवर कौतुकाचा वर्षाव होत असतानाच बॉलिवूडचा ‘सिंघम’ अजय देवगणलाही या ट्रेलरने भुरळ घातली आहे. त्याने त्याच्या सोशल मीडिया अकाऊंटवर या सिनेमाचा ट्रेलर शेअर केला आहे. तुम्ही ट्रेलर पाहिली आहे का?
अजय देवगणने त्याच्या अधिकृत इन्स्टाग्राम अकाऊंटवर ‘देवमाणूस’ चित्रपटाचा ट्रेलर शेअर केला आहे. हा ट्रेलर शेअर करत त्याने निर्माते लव रंजन आणि अंकुर गर्ग यांच्या मराठीतील पदार्पणाबद्दल अभिनंदन करत, ट्रेलर खूपच उत्कंठावर्धक आहे, देवमाणसाची सटकली की काय होते…? असे म्हणत संपूर्ण टीमला चित्रपटासाठी शुभेच्छा दिल्या आहेत. तर राजकुमार राव, अर्जुन कपूर, सनी सिंग यानेही या चित्रपटाला शुभेच्छा दिल्या आहेत.
वाचा: “मी स्वतःला ‘महागुरू’ समजतच नाही”, ट्रोलर्सला सचिन पिळगावकरांनी दिले उत्तर
काय आहे चित्रपटाचा ट्रेलर?
ट्रेलरमध्ये ‘देवमाणूस’च्या रहस्यपूर्ण, गूढ आणि भावनिक कथानकाची झलक पाहायला मिळते. ट्रेलरमधील रेणुका शहाणे आणि महेश मांजरेकर यांची जोडी संपूर्ण गावाला आवडत असते. सर्वजण महेश मांजरेकर यांना ‘देवमाणूस’ बोलतात. पण काही गुंड त्यांच्या मागे लागले आहेत. आता नेमकं काय झालं आहे हे सिनेमा पाहिल्यावरच कळेल. दमदार अभिनय, दाट भावनांचा प्रवाह आणि उत्कंठा वाढवणारे प्रसंग यामुळे हा चित्रपट एक संस्मरणीय सिनेमॅटिक अनुभव ठरणार आहे. ट्रेलरने प्रेक्षकांची उत्सुकता शिगेला पोहोचवली असून ‘देवमाणूस’ मराठी प्रेक्षकांमध्ये जागतिक स्तरावर आपली छाप सोडेल, असा विश्वास व्यक्त केला जात आहे.
कधी प्रदर्शित होणार सिनेमा?
लव फिल्म्स प्रस्तुत ‘देवमाणूस’ या चित्रपटाचे दिग्दर्शन तेजस प्रभा विजय देऊस्कर यांनी केले असून, लव रंजन आणि अंकुर गर्ग यांनी निर्मिती केली आहे. महेश मांजरेकर, रेणुका शहाणे, सुबोध भावे, सिद्धार्थ बोडके यांच्या भूमिका असणारा हा चित्रपट येत्या 25 एप्रिल 2025 रोजी चित्रपटगृहांमध्ये प्रदर्शित होणार आहे.
