माधुरी दीक्षित राजकारणात एन्ट्री करणार? स्वत: अभिनेत्रीने टीव्ही 9 च्या कॅमेऱ्यासमोर दिलं स्पष्ट उत्तर

मुंबई | 27 डिसेंबर 2023 : देशात आगामी काही दिवसांमध्ये लोकसभेची निवडणूक पार पडणार आहे. या निवडणुकीत मुंबईतील एका मतदारसंघातून अभिनेत्री माधुरी दीक्षित निवडणूक लढवणार असल्याची चर्चा गेल्या काही दिवसांपासून सुरु आहे. अखेर याबाबतच्या चर्चांवर स्वत: माधुरी दीक्षितने उत्तर दिलं आहे. त्यामुळे या चर्चांना आता पूर्णविराम मिळणार आहे. माधुरी दीक्षितने ‘पंचक’ या नव्या मराठी चित्रपटाच्या निमित्ताने ‘टीव्ही 9 मराठी’ला मुलाखत दिली. या मुलाखतीत माधुरी दीक्षित यांना राजकारणात प्रवेश करणार का? असा प्रश्न विचारण्यात आला. त्यावर माधुरी दीक्षितने सविस्तर भूमिका मांडली. यावेळी माधुरी दीक्षित सोबत तिचे पती श्रीराम नेने हे देखील उपस्थित होते. त्यांनीदेखील या प्रश्नावर उत्तर दिले. अभिनेत्री माधुरी दीक्षित आणि त्यांचे पती श्रीराम नेने हे पंचक चित्रपटाचे निर्माते आहेत.

“सगळे मला विचारत आहेत, आणि मी काहीच बोललेली नाही म्हणून म्हणत आहेत. ठीक आहे. माझं पॅशन हे क्रिएटिव्ह फिल्म आहे. त्यातून इम्पॅक्ट तयार करायचा. पण राजकारण ही माझी आवड नाही. मला असं वाटत नाही की मी त्यासाठी बनले आहे”, अशी प्रतिक्रिया माधुरी दीक्षितने दिली. याच प्रश्नावर श्रीराम नेने यांनीदेखील प्रतिक्रिया दिली. “वेगवेगळ्या चित्रपटांतून लीड करता येतं, रोल मॉडेल बनता येतं. राजकारण हे एक क्षेत्र आहे. पण चित्रपट, तंत्रज्ञान, आरोग्य विभागातही काहीतरी चांगलं काम केलं, तर त्याचा सगळ्यांना फायदा होतो”, असं श्रीराम नेने म्हणाले.

कोकणी भाषा येते का?

यावेळी माधुरी दीक्षितला कोकणी भाषा येते का? असा प्रश्न विचारण्यात आला. त्यावर माधुरीने “नाही, मला एवढी कोकणी भाषा येत नाही, पण समजते”, असं उत्तर दिलं. “माझी आजी कोकणी भाषेतली गाणी म्हणायची. माझी आई मराठी बोलायची. पण आजी कोकणी बोलायची”, असं माधुरी दीक्षितने सांगितलं. यावेळी माधुरीने कोकणी गाण्याच्या काही ओळी बोलून दाखवल्या.

यावेळी माधुरी दीक्षित आणि पती श्रीराम नेने यांनी सर्व प्रेक्षकांना 5 जानेवारीला ‘पंचक’ चित्रपट थिएटरमध्ये जाऊन बघण्याचं आवाहन केलं. तुम्हाला चित्रपट बघून मजा वाटली तर आम्हाला नक्की कळवा, असं श्रीराम नेने म्हणाले. “श्रद्धा -अंधश्रद्धा यांची आपली जागा असते. आपलं आयुष्य आपणच घडवत असतो. त्यामुळे आयुष्यात बॅलेन्स असलं पाहिजे. आयुष्यात भीती वाटली तर घाबरुन जावू नये तर बॅलेन्स विचारांनी त्याचा सामना करायला हवा”, अशी माहिती माधुरी दीक्षितने आपल्या चित्रपटाबाबत दिली.