माधुरीशी होणार होती भेट… नानांचा काय होता दुसऱ्या दिवशीचा बिग प्लान? मल्हार थेट म्हणाला…

अभिनेते नाना पाटेकर यांनी अचानक जगाचा निरोप घेतल्याने सर्वांनाच धक्का बसला आहे. नानांचे कुटुंबीय आणि त्यांच्या चाहत्यांनाही नाना गेले यावर विश्वास बसेनासा झाला आहे. नाना गोव्यात शुटिंगसाठी गेले होते. दुसऱ्या दिवशीचाही त्यांचा प्लान ठरला होता. त्यांनी हातात अनेक प्रकल्प घेतले होते. हे प्रकल्प मार्गी लावायचे होते. सामाजिक क्षेत्रातही त्यांना बऱ्याच गोष्टी करायच्या होत्या. पण त्या सर्व आता अर्धवट राहिल्या आहेत. नाना पाटेकर गेले, त्याच्या दुसऱ्या दिवशी त्यांचं काय शेड्यूल ठरलं होतं? ते काय करणार होते? याची माहिती नानांचे चिरंजीव मल्हार पाटेकर यांनी दिली आहे.

मल्हार पाटेकर यांनी हिंदुस्थान टाइम्सला मुलाखत दिलीय. त्यात त्यांनी नानांचा दुसऱ्या दिवशी काय प्लान होता? याची माहिती दिली आहे. नाना पाटेकर गोव्यात होते. माझा चुलत भाऊ प्रसाद हा नानांच्या सिनेमाशी संबंधित सर्व गोष्टी आणि त्यांच्या मिटिंग्स वगैरे पाहायचा. त्याला नानांनी मुंबईला पाठवलं होतं. कारण दुसऱ्या दिवशी माधुरी दीक्षित सोबत नानांना मराठी केबीसीची शुटिंग करायची होती. माझा दुसरा भाऊ अमेयही त्यांच्यासोबत होता. नाना घरात आराम करायला गेल्यावर अमयही तिथून निघून आला होता, अशी माहिती मल्हार पाटेकर यांनी दिली.

म्हणून उशीरा मेसेज केला

नानांना कधीच कुणाला त्रास द्यायला आवडायचं नाही. तो त्यांच्या स्वभावाचा भाग होता. त्यामुळे त्यांना जेव्हा अस्वस्थ वाटू लागलं तेव्हा त्यांनी फक्त मेसेज केला. काही वेळानंतर त्यांनी फोन केला. अमय लगेच त्यांच्याकडे पोहोचला. पण तोपर्यंत उशीर झाला होता. पहाटे 5 वाजता माझ्या आईचा फोन आला. त्यावेळी मी पुण्यात होतो. त्यानंतर काय झालं हे मला आठवत नाही. वडील गेल्याची बातमी ऐकल्यावर मी सुन्न झालो. माझ्या आसपासचं जग थिजून गेलंय असं मला वाटू लागलं, असं मल्हार म्हणाले.

सिनेमात काम करण्याचा उबग आला

यावेळी मल्हार यांनी नानांना सिनेमे करण्याचा उबग आला होता, असं सांगितलं. त्यांना सिनेमात काम करायचं नव्हतं. कारण आपण वारंवार तेच तेच करतोय, असं त्यांना वाटत होतं. त्यामुळे ते स्वत:च कथा लिहिणार होते. एक अभिनेता म्हणून स्वत:ला रोज विकसित केलं पाहिजे, यावर त्यांचा विश्वास होता. त्याच दिशेने ते मार्गक्रमण करत होते, असं मल्हार यांनी सांगितलं.