‘आतासुद्धा अडल्ट फिल्मचा बिझनेस करतोस का?’, राज कुंद्राने युजरला दिलं उत्तर

मुंबई- तुरुंगातून सुटल्यानंतर जवळपास वर्षभराने व्यावसायिक आणि अभिनेता शिल्पा शेट्टीचा पती राज कुंद्रा याने पॉर्नोग्राफी प्रकरणावर भाष्य केलं आहे. राजने ट्विटरच्या माध्यमातून नेटकऱ्यांशी संवाद साधला. यावेळी तिने युजर्सना प्रश्न विचारण्याची मुभा दिली. या प्रश्नांची उत्तरं राजनेही मोकळेपणे दिली. यावेळी काही युजर्सनी त्याला ट्रोल करण्याचा प्रयत्न केला असता त्यांनाही राजने सडेतोड उत्तर दिलं.

‘तुला अटक कशी झाली? या प्रकरणात तू कसा अडकलास किंवा शाहरुख खानचा मुलगा आर्यनप्रमाणे तुलाही अडकवलं गेलं? जर तू प्रामाणिक असशील तर पॉर्नोग्राफी प्रकरणात कोण सहभागी होतं ते आम्हाला सांग’, असं एका युजरने विचारलं.

त्यावर उत्तर देताना राज म्हणाला, “याचं उत्तर लवकरच सर्वांसमोर येईल. भष्ट्राचार, वैर, शत्रुत्व या सर्वांचा त्यात समावेश होता. माझ्या शुभचिंतकांना मी एक गोष्ट सांगू शकतो की मी आयुष्यात कोणत्याच प्रकारच्या पॉर्नोग्राफी निर्मितीत सहभागी नव्हतो किंवा मी स्वत: त्या गोष्टींची निर्मिती केली नाही.”

गेल्या वर्षी जुलै महिन्यात राज कुंद्राला पॉर्नोग्राफी प्रकरणात अटक झाली होती. दोन महिने तुरुंगात राहिल्यानंतर त्याची जामिनावर सुटका झाली. जामिनाला वर्ष पूर्ण झाल्यानंतर राजने केंद्रीय अन्वेषण विभागाला (सीबीआय) पत्र लिहून या प्रकरणात न्यायाची मागणी केली.

राजला अटक झाल्यानंतर शिल्पा शेट्टी त्याला घटस्फोट देणार असल्याचीही जोरदार चर्चा होती. मात्र तुरुंगातून सुटल्यानंतर दोघं अजूनही एकत्र असल्याने हे नाटक आहे की प्रेम असा प्रश्न एका नेटकऱ्याने विचारला. त्यावर उत्तर देताना राज म्हणाला, “मला हा प्रश्न आवडला. प्रेम हे नाटक नसतं आणि ते दिखाव्यासाठी करता येत नाही. येत्या 22 नोव्हेंबर रोजी आमच्या लग्नाचा 13 वा वाढदिवस आहे. त्यादिवशी आम्हाला शुभेच्छा द्यायला विसरू नकोस.”