‘या’ दिग्गज अभिनेत्रीला दादासाहेब फाळके पुरस्कार जाहीर
दादासाहेब फाळके पुरस्कार जाहीर; केंद्रीय मंत्री अनुराग ठाकूर यांची माहिती
मुंबई- कलाविश्वातील अत्यंत प्रतिष्ठित दादासाहेब फाळके पुरस्कार (Dada Saheb Phalke Award) हा अभिनेत्री आशा पारेख (Asha Parekh) यांना जाहीर झाला आहे. केंद्रीय मंत्री अनुराग ठाकूर यांनी याबाबतची माहिती दिली. आपल्या दमदार अभिनयाने 60 आणि 70 च्या दशकात बॉलिवूड गाजवणाऱ्या आशा पारेख यांना यंदाचा दादासाहेब फाळके पुरस्कार जाहीर झाला आहे. आशा पारेख यांनी त्यांच्या काळात प्रेक्षकांच्या मनावर राज्य केलं होतं. त्या 79 वर्षांच्या आहेत. 2 ऑक्टोबर 1942 रोजी गुजरातमध्ये त्यांचा जन्म झाला होता. गुजराती कुटुंबातून येणाऱ्या आशा यांच्या आई मुस्लिम आणि वडील गुजराती होते.
60-70 च्या दशकात आशा पारेख या केवळ चित्रपटांमुळेच नाही तर त्यांच्या मानधनामुळेही चर्चेत असायच्या. तेव्हाच्या काळात आशा सर्वाधिक मानधन घेणाऱ्या अभिनेत्रींपैकी एक होत्या.
आशा यांनी बालकलाकार म्हणून चित्रपटसृष्टीत पाऊल ठेवलं. त्यांनी आपल्या कारकिर्दीत अनेक चित्रपटांमध्ये दमदार भूमिका साकारल्या आहेत. वयाच्या 16 व्या वर्षी त्यांनी अभिनेत्री म्हणून चित्रपटसृष्टीत काम करण्यास सुरुवात केली.
Dada Saheb Phalke Award to be conferred to actor Asha Parekh this year: Union Minister Anurag Thakur pic.twitter.com/gP488Ol4zH
— ANI (@ANI) September 27, 2022
‘गूंज उठी शहनाई’ या चित्रपटासाठी निर्माते विजय भट्ट यांनी त्यांना रिजेक्ट केलं होतं. त्यानंतर आठ दिवसांनी निर्माते सुबोध मुखर्जी आणि नासिर हुसैन यांनी त्यांना एका मोठ्या चित्रपटाची ऑफर दिली. या चित्रपटाचं नाव होतं ‘दिल देके देखो’ आणि त्यात शम्मी कपूर मुख्य भूमिकेत होते. आशा पारेख यांच्या करिअरमधील हा सर्वोत्तम चित्रपट ठरला. यानंतर त्यांनी कधीच मागे वळून पाहिलं नाही.
आशा पारेख यांनी त्यांच्या करिअरमध्ये जवळपास 80 चित्रपटांमध्ये काम केलं. ‘जब प्यार किसी से होता है’, ‘घराना’, ‘भरोसा’, ‘मेरे सनम’, ‘तिसरी मंजिल’, ‘उपकार’, ‘शिकार’, ‘साजन’, ‘आन मिलो सजना’ हे त्यांचे चित्रपट विशेष गाजले आहेत.
