दुसऱ्या डिलिव्हरीनंतर डेबिनाची झाली अशी अवस्था; फोटो केले पोस्ट

मुंबई: प्रसिद्ध टीव्ही अभिनेत्री डेबिना बॅनर्जीने काही दिवसांपूर्वीच मुलीला जन्म दिला. मुलीच्या जन्मानंतर डेबिनाने सोशल मीडियावर फोटो पोस्ट करत स्वत:च्या तब्येतीचे अपडेट्स दिले आहेत. पहिल्या मुलीच्या जन्मानंतर सात महिन्यांनी डेबिना दुसऱ्या मुलीला जन्म दिला. दुसऱ्यांदा बाळाला जन्म देणं किती कठीण होतं, याबद्दल डेबिनाने या पोस्टमध्ये लिहिलं आहे. याचसोबत तिने सुजलेल्या पायाचा फोटोसुद्धा पोस्ट केला आहे.

डिलिव्हरीनंतर हात-पाय सुजल्याचं डेबिनाने सांगितलं. दुसऱ्या फोटोमध्ये तिने पोस्टपार्टम बेली दाखवली. प्रत्येक संकटावर मात करत हळूहळू ठीक होत असल्याचं तिने म्हटलंय. ‘हे खरं आहे.. काही गोष्टी तुम्हाला आणखी मजबूत बनवतात. गेले काही महिने आणि दिवस खूप कठीण होते. लोकांचे सल्ले, शारीरिक सीमा, प्रोसिजरल अडचणी.. या सर्वांचा मी सामना केला. हळूहळू मी त्यातून बरी होत आहे’, असं तिने लिहिलं आहे.

तिसऱ्या फोटोमध्ये डेबिनाने तिच्या हातात बाळाचा हात घेतल्याचं पहायला मिळतंय. ‘हे सर्व माझ्या जादुई बाळासाठी होतं. मी आता पहिल्यापेक्षा अधिक सकारात्मक आणि धाडसी झाली आहे’, असं तिने या फोटोवर लिहिलं आहे.

डेबिना आणि टीव्ही अभिनेता गुरमीत चौधरी यांनी 15 फेब्रुवारी 2011 रोजी लग्न केलं होतं. लग्नाच्या 11 वर्षांनंतर डेबिना पहिल्यांदा गरोदर झाली. 3 एप्रिल 2022 रोजी डेबिनाने गोंडस मुलीला जन्म दिला. तिचं नाव लियाना असं आहे.

पहिल्या मुलीच्या जन्मानंतर अवघ्या दोन महिन्यांत पुन्हा डेबिना गरोदर होती. 11 नोव्हेंबर रोजी तिने दुसऱ्या बाळाला जन्म दिला. 2008 मध्ये ‘रामायण’ या मालिकेच्या सेटवर डेबिना आणि गुरमीतची पहिल्यांदा भेट झाली होती. या मालिकेत गुरमीतने राम तर डेबिनाने सीतेची भूमिका साकारली होती. डेबिना बॅनर्जी आणि गुरमीत चौधरी हे टीव्हीवरील सर्वांत लोकप्रिय जोडप्यांपैकी एक आहेत.