Dhurandhar 2 : ‘धुरंधर 2’मध्ये बडे साहब आहे तरी कोण? सेटवरील फोटो लीक होताच चर्चांना उधाण

आदित्य धर दिग्दर्शित ‘धुरंधर’ या चित्रपटाला थिएटरमध्ये 58 दिवस पूर्ण झाले आहेत. तरीसुद्धा बॉक्स ऑफिसवर त्याची कमाई सुरू आहे. थिएटरमधील कमाई थांबत नसतानाही हा चित्रपट नेटफ्लिक्स या ओटीटी प्लॅटफॉर्मवर प्रदर्शित झाला आहे. ओटीटीवर येताच अवघ्या 24 तासांत हा भारतात सर्वाधिक पाहिला गेलेला चित्रपट ठरला आहे. यादरम्यान आता चाहत्यांमध्ये ‘धुरंधर 2’ या सीक्वेलविषयी प्रचंड उत्सुकता निर्माण झाली आहे. हा सीक्वेल 19 मार्च रोजी थिएटरमध्ये प्रदर्शित होणार आहे. पहिला भाग पाहिल्यानंतर यामधील ‘बडे साहब’ कोण आहे, याविषयी नेटकऱ्यांना प्रश्न पडला आहे. अशातच ‘धुरंधर 2’च्या सेटवरील काही फोटो आणि व्हिडीओ लीक झाले आहेत. या फोटोंवरून बडे साहब कोण आहे, हे समजल्याचं नेटकरी म्हणत आहेत.

‘धुरंधर’मध्ये अनेकदा ‘बडे साहब’चा उल्लेख करण्यात आला होता. परंतु त्याचा चेहरा कधीच समोर आला नव्हता. चित्रपट संपल्यानंतरही ‘बडे साहब’चा सस्पेन्स टिकून राहतो. आता ‘धुरंधर 2’च्या सेटवरील फोटो लीक झाल्यानंतर बडे साहबच्या भूमिकेविषयी विविध अंदाज व्यक्त केले जात आहेत. लीक झालेल्या या फोटोमध्ये अर्जुन रामपाल आणि संजय दत्त दिसून येत आहेत. चित्रपटात संजय हा एसपी असलम चौधरीच्या भूमिकेत आहे, तर अर्जुनने आयएसआय मेजर इक्बालची भूमिका साकारली आहे. लीक झालेल्या फोटोमध्ये दोघं बाल्कनीमध्ये उभे राहून एकमेकांशी गप्पा मारताना दिसून येत आहेत. हा फोटो व्हायरल होताच बडे साहब हा अर्जुन रामपाल असल्याचा अंदाज काहींनी व्यक्त केला.

This leaked image from the sets of Dhurandhar showing SP Aslam meeting Major Iqbal opens up so many possibilities.

What if Major Iqbal is actually Bade Sahab himself. And what if Aslam reveals to him that it was Hamza who orchestrated the murder of Rehman Dakait. Iqbal then… pic.twitter.com/PKzuovgH2W

— Fozzy (@fozzywrites) January 31, 2026

या फोटोच्या कॅप्शनमध्ये चाहत्यांनी असा दावा केला आहे की अर्जुन रामपालची भूमिका मेजर इक्बालच ‘धुरंधर’मधील बडे साहब आहे. कारण या सीनमध्ये एसपी चौधरी असलम त्याला भेटायला जातो. अनेकजण याच्याशी सहमत आहेत. तर दुसरीकडे दुसरा वर्ग असाही अंदाज व्यक्त करतोय की मेजर इक्बाल यामध्ये बडे साहब असू शकत नाही. कारण तो नेहमीच तिसऱ्या व्यक्तीबद्दल बोलत असतो.

‘धुरंधर’च्या पहिल्या भागात बडे साहबचं नाव अनेकदा नमूद करण्यात आलं होतं, परंतु त्याचा चेहरा कधीच दाखवला नव्हता. ल्यारीसह संपूर्ण पाकिस्तानच्या राजकारणावर त्याचं नियंत्रण असल्याचं कथेत दाखवलं गेलंय. त्याच्या परवानगीशिवाय काहीही घडत नाही. पाकिस्तानमध्ये वाढणाऱ्या दहशतवादाचं नियंत्रणदेखील बडे साहबच करत असतो. त्यामुळे चित्रपटातील हा बडे साहब आहे तरी कोण, हे जाणून घेण्याची प्रेक्षकांमध्ये प्रचंड उत्सुकता आहे.