विरार फास्ट लोकलमधून उडी मारलेली, पण..; हृता दुर्गुळेच्या सासूचा खुलासा, सावत्र आईकडून सोसला छळ
हृता दुर्गुळेची सासू आणि प्रसिद्ध अभिनेत्री मुग्धा शाह नुकत्याच दिलेल्या एका मुलाखतीत त्यांच्या खासगी आयुष्यातील संघर्षाविषयी मोकळेपणे व्यक्त झाल्या. यावेळी त्यांनी लहानपणीच्या कटू आठवणीही सांगितल्या आहेत.
मराठमोठी अभिनेत्री हृता दुर्गुळेची सासू ही टेलिव्हिजन इंडस्ट्रीतील अत्यंत प्रसिद्ध अभिनेत्री आहे. मुग्धा शाह यांनी विविध मराठी आणि हिंदी मालिकांमध्ये भूमिका साकारल्या आहेत. पडद्यावर कधीकधी खलनायिका साकारणाऱ्या मुग्धा शाह या खऱ्या आयुष्यात मात्र एका चौकटीतच लहानाच्या मोठ्या झाल्या. नुकत्याच दिलेल्या एका मुलाखतीत त्या त्यांच्या खासगी आयुष्याविषयी मोकळेपणे व्यक्त झाल्या. यावेळी त्यांनी एकदा विरार फास्ट लोकलमधून उडी मारल्याचाही धक्कादायक खुलासा केला आहे.
‘राजश्री मराठी’ला दिलेल्या मुलाखतीत त्यांनी सांगितलं, “आज माझं वय 63 वर्षे आहे. तुम्ही 63 वर्षे मागे जाऊन पहा.. त्यावेळी महिला किंवा मुलींमध्ये एवढी हिंमत होती का, की ते स्वत:साठी भूमिका घेतील? मी दोन वेळा भूमिका घेतली आहे.. घरातून पळून जाण्याची.. आयुष्य संपवण्याची.. विरार फास्ट लोकलमधून मी उडी मारली होती. पण आज मी इथे जिवंत आहे. प्रयत्न केले, नाही असं नाही. दिवसभर बाहेर पळून गेले मी, पण रात्री जाणार कुठे? राहणार कुठे? रात्री घरीच येणार ना, त्यामुळे स्वत:साठी कधी स्टँड घेऊ शकले नाही. कदाचित त्याच वातावरणात मी वीस वर्षे काढली, त्यानंतर सासरी.. त्यामुळे मला माझा आवाज कधीच नव्हता.”
“मला माझी मतं मांडायची आहेत, हा प्रकार कधीच झाला नाही. आजच्या तारखेलाही मी बोलू शकत नाही. एखादी गोष्ट चुकीची आहे, हे मला माहीत आहे. पण मी बोलू शकत नाही. मी या इंडस्ट्रीत अभिनय करण्यासाठी, हिरोइन बनण्यासाठी किंवा पैसे कमावण्यासाठी आले नाही. मी लग्नानंतरही जेव्हा घरात पाहुणे यायचे तेव्हा किंचनच्या पडद्याआडून चहा घेऊन जायला सांगायची. कारण जडणघडणच तशी झाली नाही, तर कोणाशी बोलायची काय हिंमत करणार,” असा सवाल त्यांनी केला.
“माझा जन्म झाला तेव्हापासून मी सावत्र आईच्या हाताखाली होते. आज लोक माझ्यातली छळ करणारी खलनायिका बघतात. पण त्याहीपेक्षा वाईट माझं बालपण गेलंय. ‘आनंदी’ या मालिकेत जेव्हा मी तिचा छळ करणारे सीन्स करते, तेव्हा शूटिंगनंतर मी तिला घट्ट मिठी मारून रडते. कारण मला माझ्या लहानपणीच्या वेदना आठवतात”, अशा शब्दांत मुग्धा व्यक्त झाल्या. मुग्धा यांच्या आईचं निधन झाल्यानंतर त्यांच्या वडिलांनी दुसरं लग्न केलं होतं. वयाच्या 20 व्या वर्षी त्यांचं लग्न झालं होतं. मात्र लग्नानंतरही त्यांनी बराच त्रास सहन केला. अखेर त्यांनी मुलांना घेऊन वेगळं राहण्याचा निर्णय घेतला.
