‘लग्नाची किंमत मोजून बिग बॉस जिंकू..’; अंकिता लोखंडेबद्दल कंगना रनौतच्या पोस्टने वेधलं सर्वांचं लक्ष

मुंबई : 10 जानेवारी 2024 | बिग बॉसच्या घरात अभिनेत्री अंकिता लोखंडे आणि तिची पती विकी जैन यांच्यात सतत भांडणं होत असल्याचं पहायला मिळतंय. या भांडणादरम्यान दोघं एकमेकांना असं काही बोलून जातात, ज्यामुळे शोनंतर त्यांचं नातं फार काळ टिकणार नसल्याचा अंदाज नेटकरी वर्तवत आहेत. अशातच विकी जैनची आई आणि अंकिताची सासू रंजना जैन यांनी नुकतीच एक मुलाखत दिली आहे. या मुलाखतीत ते सुनेबद्दल बरंच काही बोलताना दिसत आहेत. या सर्व घडामोडींदरम्यान अभिनेत्री कंगना रनौतने अंकिताला तिचा पाठिंबा दर्शविला आहे. कंगनाने तिच्या इन्स्टाग्राम स्टोरीमध्ये तिच्या सासूच्या मुलाखतीचा एक व्हिडीओ शेअर केला आहे. हा व्हिडीओ शेअर करत तिने अंकिताला पाठिंबा दिला आहे.

अंकिता गेल्या 17 वर्षांपासून या इंडस्ट्रीत काम करतेय. ती बिग बॉसच्या घरात सीनिअर असल्याने तिने तो शो जिंकावा, असं सासू रंजना जैन या व्हिडीओत म्हणताना दिसत आहेत. समर्थ जुरैलसारख्या लोकांची शो जिंकण्याची लायकी आहे का, असंही त्या म्हणतायत. हाच व्हिडीओ कंगनाने शेअर केला आहे.

कंगना रनौतची पोस्ट-

विकी जैनच्या आईच्या मुलाखतीचा हा व्हिडीओ शेअर करत कंगनाने लिहिलं, ‘त्यांचं कुटुंब मोडण्यासाठी मीडिया सर्वोत्तम काम करतेय. अंकिता लोखंडेची सासू तिची कशी साथ देतेय, हे ते तुम्हाला दाखवणार नाहीत. व्हिडीओच्या शेवटी ते हसणं खूप आवडलं. हाहाहा.. आंटी खूप क्यूट आहेत. रिॲलिटी शोज येतात आणि जातात पण कुटुंब हे सदैव सोबत असतं. माझी अशी आशा आहे की माझी मैत्रीण अंकिता लोखंडेनं हा शो जिंकावा, पण तिच्या लग्नाची किंमत मोजून नव्हे.’

विकी जैनची आई बिग बॉसच्या घरात आणि घराबाहेरही अनेकदा अंकिताला बरंवाईट बोलताना दिसली. त्यांचे बरेच व्हिडीओ सोशल मीडियावर समोर आले आहेत. बिग बॉसच्या घरात जेव्हा रंजना यांनी अंकिताची भेट घेतली, तेव्हासुद्धा दोघींमध्ये बाचाबाची झाली होती. त्यामुळे आपल्या लग्नाची किंमत मोजून अंकिताने हा शो जिंकू नये, असं मत कंगनाने मांडलं आहे. कंगना आणि अंकिता यांच्यात खूप चांगली मैत्री आहे. कारण अंकिताने कंगनाच्या ‘मणिकर्णिका : द क्वीन ऑफ झांसी’ या चित्रपटातून बॉलिवूडमध्ये पदार्पण केलं होतं.