देवाचा बाजार मांडणाऱ्यांना कर्माची परतफेड करावी लागतेच..; अभिनेत्री प्राजक्ताचं रोखठोक मत

Prajakta Parab

मराठी मनोरंजनविश्वातील अभिनेत्री प्राजक्ता परब ही तिच्या अभिनयासोबतच स्पष्टवक्तेपणासाठीही ओळखली जाते. कोणत्याही विषयावर आपलं मत मांडताना ती अनेकदा थेट भूमिका घेताना दिसते. सध्या देव, श्रद्धा आणि त्याच्या नावावर होणाऱ्या व्यावसायिक किंवा राजकीय वापराबाबत प्राजक्ताने केलेलं भाष्य चर्चेत आलं आहे. देवावर श्रद्धा असणं आणि त्या श्रद्धेचा वापर स्वतःच्या फायद्यासाठी करणं, या दोन गोष्टी वेगळ्या असल्याचं तिच्या भूमिकेतून स्पष्ट होतं.

नुकत्याच दिलेल्या एका मुलाखतीत प्राजक्ता देवाच्या नावाचा व्यवसाय आणि राजकारणासाठी केला जाणारा वापर या मुद्द्यावर मोकळेपणे व्यक्त झाली. आजच्या काळात धार्मिक भावना आणि श्रद्धेशी संबंधित विषयांभोवती मोठ्या प्रमाणात चर्चा होताना दिसते. अनेकदा देव, धर्म आणि श्रद्धेचा आधार घेऊन विविध प्रकारचे व्यावसायिक उपक्रम उभे केले जातात. त्याचप्रमाणे राजकीय चर्चांमध्येही धार्मिक मुद्द्यांना महत्त्व मिळताना दिसतं. अशा परिस्थितीत कलाकारांची मतंही चाहत्यांचं लक्ष वेधून घेतात.

पहा व्हिडीओ-

‘मज्जा पिंक’ला दिलेल्या या मुलाखतीत प्राजक्ता म्हणाली, “देव देव असतो. तो कुठल्या रुपात कधी येईल.. याबद्दल तुम्ही काहीच सांगू शकत नाही. देवाच्या नावावर व्यवसाय करणं चुकीचं आहे. उदाहरण द्यायचं झालं तर, मी शिर्डीला जाते. तिथेही व्यवसाय आहे. माझं म्हणणं एवढंच आहे की, जी लोकं व्यवसाय करतायत ना.. ते त्यांचं कर्म आहे. ते चुकीचं आहे, पण ते त्यांचं कर्म आहे. शिर्डीला पण करतात.. कुठल्या देवस्थानाला करत नाहीत? आपल्या देशात आपण या गोष्टींवर नियंत्रण आणू शकत नाही. देवाच्या नावावर व्यवसाय.. राजकारण.. देवाच्या नावावर खूप गोष्टी खपवल्या जातात. मी लक्षच देत नाही. कारण आपल्या देशात आपण या गोष्टींवर बोलू शकत नाही. त्यामुळे फक्त त्याकडे दुर्लक्ष करा. ‘इग्नोराय नम:’ हीच सर्वोत्तम गोष्ट मी आता करू शकते.”

“मला नाही पटत, मी नाही जात. मी या गोष्टी करत नाही. फक्त माझं मत एवढंच आहे की तुम्ही जे कर्म करता, त्याची परतफेड या जन्मातच करावी लागते. पुढचा जन्म कोणी बघितलाय, माहीत नाही. एकवेळ देवही मानू नका. देव मानला नाही आणि तुम्ही मनातून खूप छान असाल.. तर तो स्वत: तुमच्यासाठी धावून येईल,” असं स्पष्ट मत तिने मांडलं. तिच्या या व्हिडीओवर नेटकऱ्यांनी विविध प्रतिक्रिया दिल्या आहेत.