मुलगा असो की मुलगी, तृतीयपंथी हे गाणं म्हणून देतात शुभेच्छा, 52 वर्षांपासून प्रचंड लोकप्रिय गाणं
मुलगा असो वा मुलगी, गेल्या 52 वर्षांपासून तृतीयपंथी लोक हे गाणं म्हणून देतात बधाई. मोहम्मद रफी आणि महमूद यांच्या आवाजामुळे आजही या गाण्याची क्रेझ कायम.
घरात बाळाचा जन्म झाला की आनंदाचे वातावरण निर्माण होते. अशा वेळी तृतीयपंथी समाजातील व्यक्ती बधाई देण्यासाठी पोहोचल्या की ढोलकीची थाप, टाळ्यांचा कडकडाट आणि पारंपरिक गाण्यांनी वातावरण आणखी उत्साही होते. या बधाईच्या परंपरेत आजही काही जुनी गाणी प्रचंड लोकप्रिय ठरत आहेत. त्यापैकीच एक म्हणजे 1974 मध्ये प्रदर्शित झालेल्या ‘कुंवारा बाप’ चित्रपटातील ‘सज रही गली मेरी मां’ हे गाणं.
हे गाणं मोहम्मद रफी यांच्या आवाजात असून त्यातील महमूद यांच्या अभिनयामुळे ते अधिक संस्मरणीय ठरले. या गाण्याला राजेश रोशन यांनी संगीत दिले होते. विशेष म्हणजे, राजेश रोशन यांच्या संगीत कारकिर्दीची सुरुवातही याच चित्रपटातून झाली होती.
गाण्याची धून, उत्सवी वातावरण आणि बाळाच्या जन्माशी जोडलेला आनंद यामुळे हे गाणं तृतीयपंथींच्या बधाईच्या कार्यक्रमांमध्ये आजही ऐकायला मिळते. जवळपास पाच दशकांनंतरही या गाण्याची लोकप्रियता कायम आहे. गाण्यातील महमूद यांचे हावभाव, विनोदी शैली आणि अभिनयामुळे ते केवळ ऐकण्यासच नाही तर पाहण्यासही मनोरंजक ठरते.
‘कुंवारा बाप’ या चित्रपटाचे दिग्दर्शन महमूद यांनी केले होते आणि त्यांनीच या चित्रपटात प्रमुख भूमिकाही साकारली होती. चित्रपटात भारती, विनोद मेहरा, दक्षिण भारतीय अभिनेत्री मनोरमा तसेच महमूद यांचा मुलगा मॅकी अली यांच्या भूमिका होत्या.
आजही त्या गाण्याची लोकप्रियता कायम
या चित्रपटामागे एक संवेदनशील सामाजिक संदेशही होता. चित्रपटाची कथा चार्ली चॅप्लिन यांच्या प्रसिद्ध ‘द किड’ या चित्रपटापासून प्रेरित होती. मात्र, मनोरंजनासोबतच पोलिओ या गंभीर आजाराबाबत जनजागृती आणि लसीकरणाचा संदेश देण्याचा प्रयत्न महमूद यांनी केला होता. त्यांचा मुलगा मॅकी अली स्वतः पोलिओग्रस्त असल्याने या विषयाशी महमूद यांचा वैयक्तिक संबंध होता.
म्हणूनच ‘सज रही गली मेरी मां’ हे केवळ एक जुने हिंदी गाणं राहिलेले नाही, तर आनंद, बाळाचा जन्म, पारंपरिक बधाई आणि जुन्या हिंदी सिनेमाच्या आठवणी यांना जोडणारे एक खास गाणं म्हणून आजही त्याची ओळख कायम आहे.
