Nora Fatehi : नोरा फतेहीच्या एका व्हिडिओमुळे कंपनीला मोठा फटका ? थेट कोर्टात पोहोचलं प्रकरण
अभिनेत्री नोरा फतेही एका विमान कंपनीच्या 3 कोटींच्या दाव्यामुळे चर्चेत आहे. गांधीनगर न्यायालयात दाखल झालेल्या या प्रकरणाची पुढील सुनावणी २५ सप्टेंबर रोजी होणार असून, याकडे सर्वांचे लक्ष लागले आहे.
Bollywood Actress Nora Fatehi : बॉलिवूड अभिनेत्री नोरा फतेही (Nora Fatehi) हिच्या अडचणीत वाढ झाली आहे. तिच्या एका वक्तव्यामुळे विमान कंपनीच्या प्रतिष्ठेला धक्का पोहोचला आणि व्यवसायाचं नुकसान झालं, असा आरोप कंपनीने केला आहे. कंपनीने याप्रकरणी गांधीनगर न्यायालयात धाव घेत तब्बल 3 कोटी रुपयांच्या नुकसानभरपाईची मागणी केली आहे. हे प्रकरण गेल्या वर्षी डिसेंबर महिन्यात घडलं. नोरा फतेही हिने मुंबईहून जयपूरला जाण्यासाठी एक चार्टर्ड विमान बूक केलं होतं. या प्रवासादरम्यान तिने विमानातील व्हिडिओ रेकॉर्ड करून तो सोशल मीडियावर शेअर केला होता. मात्र या व्हिडिओमध्ये तिने त्या विमानाला ‘लेगो एअरप्लेन’ आणि ‘खेळण्याचे विमान’ असं म्हटलं, असा आरोप आहे.
अभिनेत्रीच्या या वक्तव्यामुळे कंपनीच्या व्यवसायावर विपरीत परिणाम झाल्याचा दावा विमान कंपनीने केला. नोरा हिने शेअर केलेल्या व्हिडिओनंतर कंपनीच्या प्रतिष्ठेला धक्का बसला असून, त्याचा परिणाम फ्लाइट बुकिंगवरही झाला आणि काही बुकिंग रद्द करण्यात आली, असं कंपनीने म्हटलं. नोरा हिचं वक्तव्य अतिशय अपमानास्पद आणि बेजबाबदार असल्याचं कंपनीने म्हटलं. कोणतीही तांत्रिक माहिती नसताना विमानाबाबत अशाप्रकारचं वक्तव्य करण्यात आलं, आरोपही कंपनीने केला.
25 सप्टेंबरला होणार सुनावणी
या प्रकरणी संबंधित कंपनीने याच वर्षी एप्रिल महिन्यात न्यायालयात धाव घेतली होती. आता कंपनीने नोरा फतेही यांच्याकडून 3 कोटी रुपयांच्या नुकसानभरपाईची मागणी केली आहे. PTIच्या वृत्तानुसार, या प्रकरणाची पुढील सुनावणी 25 सप्टेंबर रोजी गांधीनगर न्यायालयात होणार आहे. त्यामुळे या सुनावणीकडे सर्वांचे लक्ष लागलं आहे.
नोरा फतेहीचं काम
दरम्यान, नोरा फतेहीच्या आगामी आणि अलीकडील प्रोजेक्ट्सचीही चर्चा सुरू आहे. ती याच वर्षी एप्रिलमध्ये प्रदर्शित झालेल्या कन्नड चित्रपट ‘KD: The Devil’ मध्ये दिसली होती. KVN प्रोडक्शनच्या बॅनरखाली तयार झालेल्या या चित्रपटात ध्रुव सरजा, शिल्पा शेट्टी, संजय दत्त आणि किच्चा सुदीप यांसारखे कलाकारही महत्त्वाच्या भूमिकेत आहेत. याशिवाय नोरा फतेही ‘Side Heroes’ या आगामी चित्रपटातही झळकणार आहे. या चित्रपटात तिच्यासोबत अपारशक्ती खुराना, वरुण शर्मा, अभिषेक बॅनर्जी आणि रकुल प्रीत सिंग हे कलाकार दिसणार आहेत. हा चित्रपट याच वर्षी प्रदर्शित होण्याची शक्यता होती. मात्र, निर्मात्यांकडून अद्याप प्रदर्शनाची अधिकृत तारीख जाहीर करण्यात आलेली नाही. त्यामुळे हा चित्रपट 2027 मध्ये थिएटरमध्ये प्रदर्शित होण्याची शक्यता व्यक्त केली जात आहे.
