कधीकाळी रस्त्यावर वडापाव विकणारी चंद्रिका कशी पोहोचली बिग बॉसमध्ये?

बिग बॉस ओटीटीचा तिसरा सिझन उद्यापासून प्रेक्षकांच्या भेटीला येत आहे. या सिझनमध्ये वेगवेगळे स्पर्धक पाहायला मिळतील. या सगळ्यामध्ये चर्चेत आहे ती दिल्लीची वडापाव गर्ल चंद्रिका गेला दीक्षित… बिग बॉस ओटीटीच्या तिसऱ्या सिझनमधल्या पहिल्या स्पर्धकाचं नाव जाहीर झालं आहे. दिल्लीची वडापाव गर्ल आता बिग बॉस ओटीटी सिझन 3 मध्ये पाहायला मिळणार आहे. कधीकाळी रस्त्यावर वडापाव विकणारी चंद्रिका गेरा दीक्षित बिग बॉस ओटीटीमध्ये कशी पोहोचली? तिचा प्रवास कसा राहिला आहे? बिग बॉस ओटीटी सिझन 3 चा पहिला प्रोमो कसा आहे?

चंद्रिका मूळची मध्यप्रदेशची… लग्नानंतर ती दिल्लीत राहायला लागली. तिचा लहान मुलगा आजारी पडल्याने तिने तिची नोकरी सोडली. कुटुंब चालवण्यासाठी काहीतरी केलं पाहिजे, म्हणून तिने वडापावचा गाडा सुरु केला. यातून मिळणाऱ्या पैशांवर चंद्रिकाचं घर चालू लागलं.

चंद्रिका कशी बनली ‘वडापाव गर्ल’?

दिल्लीत वडापाव विकणारी चंद्रिका सोशल मीडियावरही अॅक्टिव्ह आहे. वडापाव विकतानाचे व्हीडिओ तिने सोशल मीडियावर शेअर केले. काही यूट्युबर्सने तिच्यावर व्लॉग शूट केले. यातलं तिचं बोलणं नेटकऱ्यांना आवडू लागलं. तिचे व्हीडिओ व्हायरल होऊ लागले. इन्स्टग्रामवर तिच्या रिल्सला मिलियनमध्ये व्ह्यूज मिळू लागले. त्यानंतर तिची सोशल मीडियावर प्रचंड चर्चा होऊ लागली. मग अनेक यूट्यूबर्सने तिच्या मुलाखती घेतल्या अन् दिल्लीच्या रस्त्यावर वडापाव विकणारी चंद्रिका झाली प्रसिद्ध ‘वडापाव गर्ल’…

व्हायरल वडापाव गर्ल ते बिग बॉस ओटीटीची स्पर्धक

चंद्रिकाकडे वडापाव खाण्यासाठी लोक रांगा लावतात. आधी हातगाड्यावर वडापाव विकणारी चंद्रिकाने आता स्वत:चं दुकान सुरु केलं आहे. आता इथेही लोक येऊन वडापाव खातात. त्यानंतर आता चंद्रिका आणि अमनदीप सिंह यांचं गाणंही रिलीज झालं. या दोघांच्या दर्जी या गाण्याला प्रेक्षकांनी पसंती दिली आहे. त्यानंतर आता चंद्रिकाने आणखी एक टप्पा गाठला आहे. आता ती बिग बॉस ओटीटीच्या तिसऱ्या सिझनमध्ये दिसणार आहे. बिग बॉसच्या घरातील चंद्रिकाचा पहिला प्रोमोदेखील रिलीज झाला आहे.