‘चोर तर मी आहेच साहेब’, जेलमध्ये असणाऱ्या राजपाल यादवचं मोठं विधान, सोशल मीडियावर होतंय व्हायरल

Rajpal Yadav : हिंदी चित्रपटसृष्टीतील दिग्गज विनोदी अभिनेता राजपाल यादव सध्या त्याच्या आयुष्यातील अत्यंत कठीण टप्प्यातून जात आहे. 9 कोटी रुपयांच्या चेक बाऊन्स प्रकरणात त्याला दिल्लीतील तिहाड जेल येथे न्यायालयीन कोठडीत ठेवण्यात आले आहे. त्याच्या जामिनाबाबत सर्वांचे लक्ष लागले असतानाच काही वर्षांपूर्वी दिलेल्या त्याच्या एक जुन्या मुलाखतीमधील एक वक्तव्य सध्या सोशल मीडियावर प्रचंड व्हायरल होत आहे.

तिहाड कारागृहात आत्मसमर्पण केल्यानंतर राजपाल यादवच्या जुन्या मुलाखती पुन्हा चर्चेत आल्या आहेत. त्या मुलाखतीत त्याला विचारण्यात आले होते की, कर्ज देणाऱ्या कंपनीकडून त्याला ‘चोर’ असे संबोधले जात आहे याबद्दल त्याची काय प्रतिक्रिया आहे? यावर राजपाल यादवने अत्यंत विनोदी अंदाजात उत्तर दिले होते. तो म्हणाला होता, ‘चोर तर मी आहेच साहेब, लहानपणापासून चोर आहे, थोडा लांबचाच चोर आहे. छलिया आहे कारण ज्या मैफिलीत मी उभा राहतो, तिथे लोकांची मने चोरून घेतो’. पुढे त्याने स्पष्ट केले की लोकांची मने जिंकण्याची सवय कायम राहील, मात्र 6 कोटी रुपयांच्या या कायदेशीर प्रकरणामुळे तो खचणार नाही.

20 वर्षांपूर्वी सुरू झालेला वाद

हे प्रकरण जवळपास दोन दशकांपूर्वीचे आहे. राजपाल यादवने दिग्दर्शित केलेल्या अता पता लापता या चित्रपटासाठी घेतलेल्या कर्जातून हा वाद सुरू झाला. कालांतराने व्याज आणि कायदेशीर गुंतागुंत वाढत गेल्याने मूळ 5 कोटी रुपयांची रक्कम वाढून 9 कोटी रुपयांपर्यंत पोहोचली. न्यायालयाच्या आदेशानुसार राजपाल यादवने आत्मसमर्पण केले असून त्याने कायद्याचा सन्मान केल्याचे मानले जात आहे.

राजपाल यादवच्या जामिनाच्या अर्जावर दिल्ली हाईकोर्ट येथे 16 फेब्रुवारी रोजी सुनावणी होणार आहे. यापूर्वी झालेल्या सुनावणीत न्यायालयाने कोणताही दिलासा दिला नाही. पुढील तारखेला तक्रारदार पक्ष आपली बाजू मांडणार आहे. त्यामुळे त्या दिवशी काय निर्णय होतो याकडे सर्वांचे लक्ष लागले आहे.

चित्रपटसृष्टीचा पाठिंबा

या कठीण प्रसंगी राजपाल यादव एकटा नाही. बॉलिवूडमधील अनेक मोठी नावे त्याच्या पाठीशी उभी राहिल्याचे सांगितले जात आहे. अभिनेता सलमान खान, अक्षय कुमार, अजय देवगन, सोनू सूद आणि वरुण धवन यांनी त्याला मदतीचा हात दिल्याची चर्चा आहे.