Javed Akhtar : प्रभू रामाचं कौतुक करताच जावेद अख्तर रडारावर, मौलवीने दिलेल्या सल्लाने खळबळ
Javed Akhtar : अभिनेता रणबीर कपूर स्टारर 'रामायण' सिनेमाचं कौतुक केल्यानंतर संगीतकार जावेद अख्तर रडारवर आले आहेत. त्यांच्या वक्तव्यानंतर मौलवीने त्यांना मोठा सल्ला दिला आहे, ज्यामुळे सर्वत्र खळबळ माजली आहे.

Javed Akhtar : बॉलिवूडचे प्रसिद्ध आणि लोकप्रिय संगीतकार जावेद अख्तर कायम कोणत्या ना कोणत्या कारणामुळे चर्चेत असतात. नुकताच झालेल्या एका कार्यक्रमात त्यांना विचारण्यात आलं की, ‘रामायण’ सिनेमाबद्दल तुम्हाला काय बोलायचं आहे. यावर जावेद अख्तर म्हणाले, सिनेमा पाहिलेला नाही. पण पाहण्याची इच्छा नक्कीच आहे.. राम फक्त एक व्यक्ती नाही तर, एक आदर्श आहेत, जीवन जगण्याचा एक मार्ग आहे. कोणत्याही धर्माचा असो, पण भारतातील प्रत्येक व्यक्तीच्या रक्तात राम आहेत…’, जावेद अख्तर यांनी असं वक्तव्य केलं. पण त्यावर मौलवीने संताप व्यक्त केला आहे. शिवाय जावेद अख्तर यांनी मोठा सल्ला दिला, ज्यामुळे सर्वत्र खळबळ उडाली आहे.
‘रामायण’ सिनेमाचं समर्थन केल्यानंतर ऑल इंडिया इमाम असोसिएशनचे मौलाना साजिद रशीदी यांनी त्यांना लक्ष्य केलं आहे. मौलाना साजिद रशीदी म्हणाले, ‘जावेद अख्तर आणि त्यांचं संपूर्ण कुटुंब हे एक व्यावसायिक कुटुंब आहे. बॉलिवूडमध्ये त्यांची गाणी विकली जातात. अशात जर त्यांनी अशा गोष्टी केल्या नाहीत, तर त्यांची गाणी कोण विकत घेणार? ते सार्वजनिक मंचावर अनेकदा बोलले आहेत की मी नास्तिक आहे. एका मोठ्या चर्चेदरम्यान त्यांनी म्हटलं होतं की मी कोणत्याही धर्माला मानत नाही.
‘मी अल्लाह किंवा रामाला मानत नाही. म्हणजेच, ते मानतातच की ईश्वर अस्तित्वात नाहीच. जे नास्तिक आहेत ते रामावर एवढी श्रद्धा दाखवत असतील, तर माझा त्यांना एक सल्ला आहे की त्यांनी घरवापसी करावी आणि स्वतःचं नाव जावेद अख्तर ऐवजी ‘रामपाल’ ठेवावं. त्यांना हे नाव छान वाटेल. कमीत कमी 80 टक्के हिंदू तुम्हाला पूर्ण मान आणि सन्मान देतील. आता तर तुम्ही कुंपणावरचे झाला आहात, कधी इकडे तर कधी तिकडे, त्यामुळे तुम्ही एका बाजूला आलं पाहिजे जेणेकरून हिंदू तुमचा पूर्ण सन्मान करतील. कैफी आझमीसुद्धा गाणी लिहायचे, त्यांनी कधीही पैशासाठी आपला इमान विकला नाही…’, मौलवी असं संतापात म्हणाले.
सांगायचं झालं तर, जावेद अख्तर यांनी याआधी एकदा धर्माबद्दल मोठं वक्तव्य केलं होतं. ते म्हणालेले, ‘मी धार्मिक लोकांचा आदर करतो… माझा जन्म मुस्लिम कुटुंबात झाला आहे आणि माझ्यावर संस्कार देखील तसेच झाले आहेत. पण तरुण वयात मी नास्तिक झालो. मी मुस्लिम कुटुंबात जन्मलोय, त्यामुळे मी ते पाळत आहे.” एका धार्मिक मुद्द्यावरील वक्तव्यानंतर झालेल्या ट्रोलिंगबद्दल बोलताना ते म्हणाले होते, “जेव्हा मला धर्माच्या नावाखाली ट्रोल केलं जाते, तेव्हा मला हसू येतं. बरेच जण मला ‘जिहादी’ म्हणतात, तर अनेक जण मला पाकिस्तानात जाण्याचा सल्ला देतात. मी या गोष्टींकडे एक विनोद म्हणून पाहतो.’, असं देखील जावेद अख्तर म्हणालेले.
