Sanjay Dutt: VIP असूनही लालबागच्या राजाच्या दरबारात बायकोसाठी संजय दत्तला करावं लागलं असं काम

संजय दत्त आणि त्याची पत्नी मान्यता

Sanjay Dutt: मुंबईतील प्रसिद्ध लालबागचा राजा मंडपात गणेशोत्सवानिमित्त बॉलिवूड सेलिब्रिटींची मांदियाळी पाहायला मिळत आहे. अभिनेता संजय दत्त याने पत्नी मान्यता दत्तसोबत मंगळवारी 22 सप्टेंबरला लालबागच्या राजाचं दर्शन घेतलं. यावेळी गर्दीतून मार्ग काढताना संजय दत्त पत्नी मान्यताची विशेष काळजी घेताना दिसला. त्याचा हा व्हिडीओ सोशल मीडियावर चर्चेचा विषय ठरत आहे. संजय दत्तने यावेळी नारंगी रंगाचा कुर्ता परिधान केला होता, तर मान्यता गुलाबी रंगाच्या पारंपरिक पोशाखात दिसली. बाप्पाच्या दर्शनासाठी मोठी गर्दी असल्याने संजयसोबत सुरक्षारक्षकांचाही बंदोबस्त होता. मंडपाकडे जाताना संजय सतत मान्यताच्या जवळ राहिला. गर्दीत तिची गैरसोय होऊ नये, याची तो काळजी घेत असल्याचं व्हिडीओमध्ये दिसत आहे.

दर्शनादरम्यान संजय दत्त बाप्पाच्या चरणी नतमस्तक झाला. त्यानंतर त्याने स्वतःच्या आणि मान्यताच्या कपाळावर टिळा लावला. बाप्पाच्या दर्शनानंतर माध्यमांशी संवाद साधताना त्याने लालबागच्या राजावरील आपली श्रद्धाही व्यक्त केली. पुन्हा एकदा बाप्पाचं दर्शन घेता आलं, हे आपलं भाग्य असल्याचं त्याने सांगितलं. दरवर्षी बाप्पाने आपल्याला दर्शनासाठी बोलवावं आणि आपण येत राहावं, अशी इच्छा असल्याचंही संजयने म्हटलं.

पहा व्हिडीओ-

संजय दत्तच्या लालबागच्या राजाच्या दर्शनातील आणखी एक क्षण कॅमेऱ्यात कैद झाला. संजय दत्त आणि मान्यता दर्शनासाठी मंडपाच्या दिशेने जात असताना अनन्या पांडे आणि तिचे वडील चंकी पांडे दर्शन घेऊन बाहेर पडत होते. याचवेळी दोन्ही कुटुंबांची क्षणिक भेट झाली. या सेलिब्रिटी क्रॉसओव्हरचाही व्हिडीओ सोशल मीडियावर व्हायरल होत आहे.

पहा व्हिडीओ-

यंदाच्या गणेशोत्सवात लालबागच्या राजाच्या चरणी अनेक बॉलिवूड कलाकारांनी हजेरी लावली आहे. संजय दत्तच्या आधी शाहरुख खान पत्नी गौरी खान आणि मुलगी सुहाना खानसोबत बाप्पाच्या दर्शनासाठी पोहोचला होता. रणवीर सिंहनेही पारंपरिक वेशात लालबागच्या राजाचं दर्शन घेतलं. मुंबईच्या गणेशोत्सवातील लालबागचा राजा हे श्रद्धेचं महत्त्वाचं केंद्र मानलं जातं. सर्वसामान्य भक्तांपासून बॉलिवूडच्या दिग्गजांपर्यंत अनेक जण दरवर्षी येथे दर्शनासाठी येतात. यंदाही सेलिब्रिटींच्या उपस्थितीमुळे लालबागचा राजाचा दरबार चर्चेत आहे.