शाहरुख खानचा सर्वात मोठा फ्लॉप चित्रपट, ज्याची कमाई पाहून निर्माता, दिग्दर्शक आणि अभिनेता ढसाढसा रडले

Shah Rukh Khan : 1990 च्या दशकात आणि 2000 च्या सुरुवातीला शाहरुख खान हा बॉलिवूडमधील सर्वात लोकप्रिय अभिनेत्यांपैकी एक होता. 1992 साली प्रदर्शित झालेल्या ‘दीवाना’ या चित्रपटातून त्याने अभिनय कारकिर्दीची सुरुवात केली. त्यानंतर त्याने अनेक सुपरहिट चित्रपट दिले. सलग यशस्वी चित्रपटांमुळे त्याला ‘किंग खान’ म्हणूनही ओळख मिळाली.

मात्र यशाच्या शिखरावर असतानाही एका चित्रपटाच्या अपयशाने शाहरुख खान खूप खचला होता. इतकेच नाही तर त्या चित्रपटाचे दिग्दर्शक आणि अभिनेत्री जूही चावला सुद्धा या अपयशामुळे भावूक झाली होती. या चित्रपटाद्वारे शाहरुख खानने निर्माता म्हणूनही पदार्पण केले होते. हा चित्रपट होता ‘फिर भी दिल है हिंदुस्तानी’. जो 2000 साली प्रदर्शित झाला. या चित्रपटाचे दिग्दर्शन अझीझ मिर्झा यांनी केले होते. चित्रपटात शाहरुख खान आणि जूही चावला मुख्य भूमिकेत होते.

चित्रपट फ्लॉप झाल्यावर तिघेही रडले

शाहरुख खानने अभिनेत्री प्रिती झिंटाच्या Up Close and Personal with PZ या टॉक शोमध्ये या चित्रपटाबद्दल खुलासा केला होता. त्याने सांगितले की त्या काळात हा चित्रपट त्याच्या करिअरमधील सर्वात मोठ्या फ्लॉपपैकी एक मानला जात होता.

शाहरुख म्हणाला होता की, ‘मी माझ्या कोणत्याही चित्रपटासाठी टेबलावर बसून कधी रडलो नाही. पण या चित्रपटासाठी आम्ही तिघेही प्रचंड रडलो. आम्हाला सतत वाटत होते की आपल्याकडून काय चूक झाली. ‘फिर भी दिल है हिंदुस्तानी’ हा चित्रपट अजिबात चालला नाही आणि तो आमच्या करिअरमधील मोठ्या फ्लॉपपैकी एक ठरला.’

बॉक्स ऑफिसवर अपयश

‘फिर भी दिल है हिंदुस्तानी’ हा चित्रपट सुमारे 13 कोटी रुपयांच्या बजेटमध्ये तयार करण्यात आला होता. ‘बॉक्स ऑफिस इंडिया’च्या माहितीनुसार, चित्रपटाने पहिल्या आठवड्यात 5 कोटी रुपयांपेक्षा थोडी जास्त कमाई केली. भारतात या चित्रपटाची एकूण कमाई सुमारे 18.2 कोटी रुपये झाली आणि त्यामुळे तो बॉक्स ऑफिसवर फ्लॉप ठरला.

या चित्रपटाला IMDb वर 6.2 इतकी रेटिंग मिळाली आहे. मात्र, बॉक्स ऑफिसवर अपयशी ठरलेला हा चित्रपट नंतर अनेक प्रेक्षकांना आवडला आणि आजही काहीजण तो वेगळ्या विषयामुळे लक्षात ठेवतात.