आधी टिकली लाव मग मी बोलेन..; संभाजी भिंडेंच्या ‘त्या’ वक्तव्यावर मराठी अभिनेत्रीचं वेगळं मत चर्चेत

शिवप्रतिष्ठान संस्थेचे संस्थापक संभाजी भिडे मागच्या वर्षी मंत्रालयात आले होते. तेव्हा त्यांना एका महिला पत्रकाराने तुम्ही कुणाची भेट घेण्यासाठी आला आहात? असा प्रश्न विचारला. तेव्हा संभाजी भिडे यांनी त्या महिला पत्रकाराला टिकलीवरून सुनावलं. प्रत्येक स्त्री भारतमाता आहे. आमची भारतमाता विधवा नाही, त्यामुळे तू आधी कुंकू, टिकली लाव मग मी तुझ्याशी बोलेन, असं संभाजी भिडे म्हणाले होते. वादग्रस्त वक्तव्यांमुळे चर्चेत असणाऱ्या संभाजी भिडेंच्या या वक्तव्यानेही वाद निर्माण झाला होता. संभाजी भिडेंच्या त्या विधानावर मराठी अभिनेत्रीने भाष्य केलं आहे.

संभाजी भिडेंसोबतच्या भेटीची आठवण

अभिनेत्री राधिका देशपांडे हिने संभाजी भिडे यांच्या त्या विधानावर एका मुलाखतीत प्रतिक्रिया दिली आहे. सांगलीतील मिरजला ‘नथुराम गोडसे’ नाटकाचा प्रयोग होता. तिथे भिडे काकांची भेट झाली. सहाजिकच मला फोटो काढावासा वाटला. मी फोटो काढला आणि तो ठेवला होता.मी काय मी लगेच पोस्ट केला नव्हता. त्याच दरम्यान टिकलीवर काहीतरी घाव घालण्यात आला. भिडेकाकांवर बोललं गेलं की, त्यांनी सांगितलं पत्रकाराला, एक बाई होती. त्यांना सांगितलं की तू टिकली लावून ये मग मी बोलेन. आता ते कुठल्या याच्यावर बोलले ते मला काहीच माहिती नाही, असं राधिका म्हणाली.

राधिका देशपांडेचं विधान चर्चेत

टिकली लावायची की नाही लावायची, कधी लावायची का नाहीच लावायची या विषयावर प्रत्येक स्त्रीला स्वातंत्र्य असायला हवं. कुंकवाला पर्याय म्हणून आपण टिकली लावतो. तर मला खूप विचार करावासा वाटला. भिडे काका असं बोलले, का बोलले असतील? मग खरंच ते बरोबर आहे का? मग खरंच आपण आपली संस्कृती सोडतो आहोत का? टिकली लावली नाही तर… प्रत्येक ठिकाणी जाण्याचा मला असं वाटतं सभ्यता आणि शिष्टाचार असतो. मला असं वाटतं की टिकली लावायला पाहिजे. न लावून फार असे काय तुम्ही ग्रेट आहात, असं दाखवत असाल तर ते तसं नाहीये. टिकली लावणाऱ्या बायका पण अतिशय सुंदर दिसतात, असं मत राधिकाने मांडलं आहे. तिचं हे विधान सध्या चर्चेत आहे.