कैची घेतली अन् गायिकेनं स्टेजवरच सर्वांसमोर कापले केस; काय आहे कारण?

Turkish singer Melek Mosso

Image Credit source: Instagram

मुंबई- इराणमध्ये हिजाबचा वाद (Iran Hijab Protest) चांगलाच पेटला आहे. फक्त इराणमध्येच नाही तर इतर देशांमध्येही हिजाबविरोधातील मोहिमेचे पडसाद उमटण्यास सुरुवात झाली आहे. आतापर्यंत या वादात जवळपास 75 लोकांनी आपले प्राण गमावले आहेत, तर 700 हून अधिक लोकांवर अटकेची कारवाई करण्यात आली आहे. हिजाबविरोधातील या मोहिमेत इराणच्या महिलांना देशातील कानाकोपऱ्यातून पाठिंबा मिळत आहे. अशातच आता एका तुर्की गायिकेनं (Turkish Singer) या मोहिमेला आपल्याच अंदाजात समर्थन दिलंय.

तुर्की गायिका मेलेक मोसोचा एक व्हिडीओ सध्या सोशल मीडियावर तुफान व्हायरल होत आहे. या व्हिडीओमध्ये स्टेजवर उभी असलेली मेलेक ही कैची हातात घेऊन आपले केस कापताना पहायला मिळत आहे. इराणमध्ये सुरू असलेल्या हिजाबविरोधी मोहिमेला समर्थन देण्यासाठी तिने आपले केस कापले.

इराणमध्ये 22 वर्षीय तरुणी महसा अमिनीच्या मृत्यूनंतर या मोहिमेला सुरुवात झाली. महसाने योग्य पद्धतीने हिजाब परिधान केला नव्हता, म्हणून तिला पोलिसांनी अटक केली होती.

13 सप्टेंबर रोजी ती तिच्या कुटुंबीयांसोबत सहज बाहेर फिरायला गेली होती. यादरम्यान तिने हिजाब नीट परिधान केला नाही म्हणून मॉरल पोलिसांनी महसाला अटक केली. इतकंच नव्हे तर तिला रि-एज्युकेशन सेंटरमध्ये खूप मारलं गेलं. यानंतरच तिची प्रकृती बिघडली आणि तिचं निधन झालं.

निधनापूर्वी महसा तीन दिवस कोमामध्ये होती. तिच्या निधनानंतर इराणमध्ये तीव्र संताप व्यक्त केला गेला. हळूहळू हिजाबविरोधातील ही मोहीम जगभरात पसरली. अनेक महिलांनी केस कापत या मोहिमेत भाग घेतला.

इराणमध्ये हिजाबसंदर्भात अत्यंत कठोर नियम बनवण्यात आले आहेत. याविरोधात असंख्य महिला या मोहिमेत सहभागी झाल्या आहेत. विविध सेलिब्रिटीसुद्धा त्याविरोधात आवाज उठवत आहेत.