Israel US Iran War : युद्ध सुरु असताना इस्रायलची भीष्म प्रतिज्ञा, इराणला घाम फोडणारी सर्वात मोठी घोषणा
Israel US Iran War : इराण विरोधात अमेरिका-इस्रायलने पुकारलेल्या युद्धाला आठ दिवस होऊन गेले आहेत. आज इस्रायलने एक मोठी प्रतिज्ञा बोलून दाखवली आहे. शांती तर दूर राहिली पण त्यामुळे इराणचं टेन्शन नक्कीच वाढणार आहे. आतापर्यंत हजारो लोकांचा या युद्धात मृत्यू झाला आहे.
मध्यपूर्वेत सुरु असलेल्या युद्धाचा आज आठवा दिवस आहे. इस्रायल-अमेरिकेकडून इराणवर जोरदार हल्ले सुरु आहेत. दुसरीकडे इराणकडून इस्रायल आणि आखाती देशांवर हल्ले होत आहेत. हे युद्धात इतक्यात तरी संपणार नाही हे स्पष्ट आहे. इराणमध्ये जो पर्यंत सत्ता बदल होत नाही, त्यांच्या मनासारखा नवीन शासक तिथे येणार नाही, तो पर्यंत हे युद्ध थांबणार नाही, हे अमेरिका आणि इस्रायल दोघांनी स्पष्ट केलय. त्यामुळे इतक्यात तरी या युद्धाचा शेवट नाही. उलट दिवसेंदिवस हे युद्ध अजून भीषण होत जाणार आहे. इस्रायलने हे युद्ध चालू असताना आता एक मोठी घोषणा केली आहे. ही घोषणा अशी आहे की, इराणमध्ये शांती नजीक भविष्यात शांतता स्थापित होणार नाही.
इराणने मागच्या आठवड्यात युद्धाच्या पहिल्याचं दिवशी सुप्रीम लीडर अयातोल्लाह अली खामेनीला संपवलं. आता त्यांच्यानंतर पुढचा उत्तराधिकारी कोण? याची चर्चा सुरु झाली आहे. अयातोल्लाह अली खामेनी यांच्या नंतर त्यांचा जो कोणी उत्तराधिकारी बनणार त्याला आणि या निवडीच्या प्रकियेत जे लोक असतील त्यांना संपवणार अशी प्रतिज्ञाच इस्रायलने केली आहे. तेहरान लवकरच नव्या सुप्रीम लीडरची घोषणा करण्याच्या जवळ आहे असं वृत्त इराणच्या स्टेट मीडियाने दिलं होतं.
IDF ने काय इशारा दिलाय?
जुलमी खामेनीला संपवल्यानंतर इराणमधील दहशतवादी राजवट पुन्हा एकदा एकत्र येऊन नवीन सुप्रीम लीडर नेमण्याच्या तयारीत आहे असं इस्रायली डिफेन्स फोर्सेसने म्हटलं. जो कोणी नवा सुप्रीम लीडर बनेल तसच त्याला नेमणाऱ्यांपर्यंत इस्रायलचे हात पोहोचतील असं इस्रायली संरक्षण दलाकडून सांगण्यात आलं. उत्तराधिकारी निवडण्याच्या प्रक्रियेत जे आहेत, त्यांना सुद्धा इस्रायली लष्कराकडून इशारा देण्यात आलाय.
मोठ्या प्रमाणात हवाई हल्ले
इस्रायल-अमेरिकेने इराणच्या तेल डेपोंना लक्ष्य केलं. त्यामुळे तेहरानमधील इंधन पुरवठा विस्कळीत झाला आहे. इंधन डेपोचं नुकसान झाल्यामुळे वितरण साखळी प्रभावित झालीय असं तेहरानचे गव्हर्नर मोहम्मद सादेह यांनी सांगितलं. इस्रायल आणि अमेरिकेकडून इराणवर मोठ्या प्रमाणात हवाई हल्ले सुरु आहेत.
