इराणनंतर आता कोणाचा नंबर? डोनाल्ड ट्रम्प यांचे नवीन टार्गेट ठरले

सध्या इराण विरुद्ध इस्रायल आणि अमेरिका यांच्यातील संघर्ष दिवसेंदिवस वाढत चालला आहे. त्यातच अमेरिकेचे राष्ट्राध्यक्ष डोनाल्ड ट्रम्प यांनी जागतिक राजकारणात खळबळ उडवून देणारे एक मोठे विधान केले आहे. आमचे पहिले प्राधान्य इराणसोबत सुरू असलेला संघर्ष यशस्वीपणे संपवणे हे आहे, पण हा विषय मार्गी लागल्यानंतर अमेरिका आपले पूर्ण लक्ष क्युबाकडे वळवेल,” असे स्पष्ट संकेत ट्रम्प यांनी दिले आहेत. व्हाईट हाऊसमध्ये इंटर मियामी सीएफ (Inter Miami CF) फुटबॉल क्लबच्या विजयानिमित्त आयोजित एका विशेष कार्यक्रमात ते बोलत होते.

यावेळी ट्रम्प यांनी इराणविरुद्ध सुरू असलेल्या लष्करी कारवाईबाबत प्रचंड आत्मविश्वास व्यक्त केला आहे. अमेरिका आणि इस्रायल ठरवलेल्या वेळापत्रकापेक्षा कितीतरी वेगाने इराणची लष्करी ताकद नष्ट करत आहेत. गेल्या ७२ तासात अमेरिकेने इराणच्या २४ युद्धनौका समुद्रात बुडवल्या आहेत. यामुळे इराणचे नौदल आता पूर्णपणे बचावात्मक भूमिकेत आले आहे. त्यासोबतच इराणचे हवाई दल जवळपास निकामी झाले आहे. त्यामुळे त्यांचे लढाऊ विमान ताफा आता उडण्याच्या स्थितीत नाही, असा दावा ट्रम्प यांनी केला आहे.

इराणकडून सतत वाटाघाटीचा प्रस्ताव

इराणची हवाई संरक्षण यंत्रणा आता पूर्णपणे खिळखिळी झाली आहे. ज्यामुळे अमेरिकन विमाने कोणत्याही अडथळ्याशिवाय इराणच्या आकाशात वावरू शकतात. इराणला आता कळून चुकले आहे की ते अमेरिकेसमोर टिकू शकत नाहीत. आम्हाला त्यांच्याकडून सातत्याने करारासाठी संदेश येत आहेत. ते आता युद्ध थांबवण्यासाठी वाटाघाटी करण्यास तयार आहे. मात्र, जोपर्यंत अमेरिकेच्या अटी पूर्ण होत नाहीत आणि त्यावर ठोस निर्णय होत नाही, तोपर्यंत ही मोहीम थांबणार नाही, असा इशारा ट्रम्प यांनी दिला.

पुढचं टार्गेट कोण?

इराणचा लष्करी अध्याय संपल्यानंतर ट्रम्प सरकार त्यांचा मोर्चा क्युबाकडे वळणार आहे. मियामीमध्ये क्युबन-अमेरिकन समुदायाची मोठी उपस्थिती लक्षात घेता ट्रम्प यांचे हे विधान अत्यंत महत्त्वाचे मानले जात आहे. क्युबा सध्या अमेरिकेशी तडजोड करण्यास इच्छुक आहे. त्यामुळे त्यांना टार्गेट करण्यास आता फार वेळ लागणार नाही. भविष्यात क्युबाचे अनेक रहिवासी, जे सध्या निर्वासित म्हणून अमेरिकेत आहेत, ते सन्मानाने आपल्या मायदेशी परतताना दिसू शकतील, असे ट्रम्प यांनी म्हटले.

दरम्यान ट्रम्प यांच्या या मिशन वर्ल्ड पीस आणि आक्रमक परराष्ट्र धोरणामुळे लॅटिन अमेरिका आणि मध्य पूर्वेतील राजकारणात मोठ्या उलथापालथी होण्याची शक्यता वर्तवली जात आहे. आता ट्रम्प सरकार इराणनंतर क्युबाबाबत नेमकी काय पावले उचलतात, याकडे आता संपूर्ण जगाचे लक्ष लागले आहे.