हुकूमशाह किम जोंगच्या उत्तर कोरियाची जगाला धडकी भरवणारी कृती, अमेरिका, जपान, दक्षिण कोरियामध्ये खळबळ

उत्तर कोरियाने पुन्हा एकदा जगात अस्वस्थता, अस्थिरता निर्माण होईल अशी कृती केली आहे. अणवस्त्र संपन्न असलेला उत्तर कोरिया सतत जगाला धमक्या देत असतो.उत्तर कोरियापासून सर्वाधिक धोका दक्षिण कोरियाला आहे. अमेरिकाविरोधी असलेल्या उत्तर कोरियाला रशिया, चीन या देशांचं पाठबळ आहे. उत्तर कोरियाने रविवारी कोरियाई बेटाच्या पूर्वेकडच्या समुद्रात एक बॅलेस्टिक मिसाइल डागलं. जपानच्या संरक्षण मंत्रालयाने याची माहिती दिली. उत्तर कोरियाने प्रोजेक्टाइल डागल्याची माहिती दक्षिण कोरियाच्या संरक्षण मंत्रालयाने दिली आहे.

जपानच्या स्पेशल इकोनॉमिक झोनच्या बाहेर जाऊन हे मिसाइल पडल्याची माहिती जपानच्या सरकारी मीडियाने दिली. मागच्या आठवड्यात उत्तर कोरियाने अमेरिकेच्या नेतृत्वाखाली झालेल्या नौदल युद्ध सरावाची निंदा केली होती. या युद्धसरावात दक्षिण कोरिया आणि जपान सहभागी झाले होते. 29 ऑगस्ट ते 10 सप्टेंबरपर्यंत गुआम जवळ हा युद्ध सराव सुरु होता.

अणवस्त्र धोरणाबद्दल काय म्हटलं?

उत्तर कोरियाचा हुकूमशाह किम जोंग उनची बहिण किम यो जोंगने शुक्रवारी कोरियाई उपखंडातील वाढत्या तणावासाठी अमेरिकेला जबाबदार धरलं होतं. आम्ही आमची अणवस्त्र मजबूत करण्याच्या धोरणामध्ये कुठलाही बदल करणार नाही असं किम यो जोंग म्हणाले.

दक्षिण कोरियाने बोलावली तातडीची बैठक

उत्तर कोरियाच्या मिसाइल लॉन्चनंतर दक्षिण कोरियाच्या राष्ट्रपती कार्यालयाने रविवारी राष्ट्रीय सुरक्षा परिषदेची बैठक बोलावली होती. रिपोर्ट्नुसार, उत्तर कोरियाने वॉनसान भागाच्या पूर्वेकडच्या समुद्रात कमी पल्ल्याच बॅलेस्टिक मिसाइल डागलं.

[Emergency alert] North Korea has launched a suspected ballistic missile. More updates to follow.

— PM’s Office of Japan (@JPN_PMO) September 20, 2026

संयुक्त राष्ट्र सुरक्षा परिषदेच्या प्रस्तावचं थेट उल्लंघन

दक्षिण कोरियाने या मिसाइल लॉन्चची निंदा केली आहे. एक आठवड्याच्या आत उत्तर कोरियाचं हे दुसरं मिसाइल परीक्षण आहे. याआधी 12 सप्टेंबरला परीक्षण केलं होतं. दक्षिण कोरियाने उत्तर कोरियाला तात्काळ मिसाइल चाचण्या थांबवण्याचं आवाहन केलं आहे. उत्तर कोरियाची ही चाचणी संयुक्त राष्ट्र सुरक्षा परिषदेच्या प्रस्तावचं थेट उल्लंघन आहे.