आता फिरायला येऊ नका… शेजारच्या देशाने जारी केले आदेश; पुन्हा महासंकट?
नेपाळमध्ये पुन्हा महासंकटाची चाहूल लागली आहे. 25 ते 27सप्टेंबर दरम्यान अतिवृष्टीचा धोका असल्याने नेपाळ पर्यटन विभागाने सुरक्षा सल्ला जारी केला आहे. विशेषतः नद्या आणि डोंगराळ भागात जाणे टाळावे. मागील जलप्रलयात अनेकांनी जीव गमावला होता. पर्यटकांनी हवामानाची माहिती घेऊनच प्रवास करावा, असे आवाहन करण्यात आले आहे.
संकटातून कसंबसं सावरणाऱ्या नेपाळमध्ये पुन्हा एकदा महासंकट घोंघावताना दिसत आहे. त्यामुळेच नेपाळच्या पर्यटन विभागाने सुरक्षा अॅडव्हायजरी जारी केली आहे. नेपाळमध्ये फिरायला येण्याचा प्लान करत असाल तर येऊ नका. 25 ते 27 सप्टेंबर दरम्यान देशातील अनेक भागात अतिमुसळधार पाऊस कोसळण्याची शक्यता आहे. त्यामुळे तुम्ही नेपाळमध्ये येणं टाळा. खासकरून नदी आणि डोंगराळ भागात येऊ नका, अशा सूचनाच नेपाळच्या पर्यटन विभागाने (Nepal Travel Advisory) दिल्या आहेत. हवामान विभागाच्या अंदाजाचा हवाला देऊन पर्यटन विभागाने या सूचना जारी केल्या आहेत.
26 ऑगस्ट रोजी नेपाळमध्ये जलप्रलयाने प्रचंड हाहा:कार माजवला होता. या जलप्रलयात 1451 लोकांचा मृत्यू झाला होता. तर 5705 लोक बेपत्ता झाले होते. यात 636 विदेशी पर्यटकांचाही समावेश आहे. मंगळवारी जल विज्ञान आणि हवामान विज्ञान विभागाने शुक्रवार आणि रविवारपर्यंत पूर्व कोशी, दक्षिणी मधेश, मध्य बागमती आणि पश्चिम सुदूरपश्चिम प्रांतातील अनेक भागात अतिवृष्टी होण्याची शक्यता वर्तवली असून अलर्ट जारी केला आहे. कर्णाली, गंडकी आणि लुंबिनीसहीत पश्चिम प्रांतात विजांच्या कडकडाटासह पाऊस होणार असल्याचा अंदाजही वर्तवण्यात आला आहे.
सूचना काय आहेत?
अतिवृष्टीचा धोका असल्याने एनटीबीने ट्रॅव्हल अॅडव्हायजरी जारी केली आहे. नदी, डोंगराळ भाग, उंच भागाच्या ठिकाणी पर्यटकांनी जाऊ नये, असं आवाहन एनटीबीने केलं आहे. पर्यटकांनी या भागात अतिरिक्त सावधानता बाळगण्याच्या सूचनाही करण्यात आल्या आहेत. हवामान वेगाने बदलत आहे. उंच भागात बर्फवृष्टी होऊ शकते. भोटे कोशी आणि त्रिशुली नदी परिसरात आलेल्या महापुरात अनेकांना जीव गमवावा लागला होता. त्यामुळेच एनटीबीने पर्यटकांना प्रवास सुरू करण्यापूर्वी हवामानाची माहिती घेऊनच बाहेर पडावे. रस्ते, फ्लाईट, ट्रेकिंग रुट आदींच्या स्थितीची माहिती घेऊनच नेपाळमध्ये या, असं एनटीबीने म्हटलं आहे.
विनाकारण फिरू नका
हवामान खराब असेल तर विनाकारण बाहेर फिरू नका. ज्या भागाला अधिक धोका आहे, अशा भागात जाणं टाळा. नदी, तलाव, दऱ्या, डोंगराळ भाग, उंच भाग आणि भूस्खलन होणाऱ्या परिसरात जाताना सावध होम्याचा सल्लाही देण्यात आला आहे.
