पाकिस्तान-अफगाणिस्तानमध्ये युद्ध पेटलं, आतापर्यंतचा सर्वात मोठा हल्ला, तासाभरात काय काय घडलं?

गेल्या काही दिवसांपासून पाकिस्तान आणि अफगाणिस्तानच्या सीमावर्ती भागात तणावपूर्ण परिस्थिती निर्माण झाली आहे. पाकिस्तानने अफगाणिस्तानातील कंधार प्रांतात तालिबानच्या लष्करी तळांना लक्ष्य करत भीषण हवाई हल्ले केले आहेत. पाकिस्तानच्या विविध शहरांवर झालेल्या ड्रोन हल्ल्यांना प्रत्युत्तर देण्यासाठी ही कारवाई करण्यात आली, असा दावा इस्लामाबादने केला आहे.

गेल्या काही दिवसांपासून पाकिस्तानमधील रावळपिंडी, कोहट आणि क्वेट्टा यांसारख्या प्रमुख शहरांच्या आकाशात अज्ञात ड्रोन घिरट्या घालताना आढळले होते. पाकिस्तानी सुरक्षा यंत्रणांनी हे ड्रोन पाडण्यात यश मिळवले असले तरी, त्यांचे ढिगारे नागरी वस्त्यांमध्ये पडल्याने मोठे नुकसान झाले आहे. या ड्रोनचे अवशेष क्वेट्टा आणि रावळपिंडीमध्ये पडल्याने दोन मुलांसह अनेक नागरिक जखमी झाले आहेत. या ड्रोन घुसखोरीनंतर खबरदारीचा उपाय म्हणून राजधानी इस्लामाबादचे हवाई क्षेत्र काही काळासाठी पूर्णपणे बंद करण्यात आले होते. पाकिस्तानने या घटनेला रेड लाईन क्रॉस करणे, असे म्हटले होते.

तालिबान सरकारकडून निषेध

पाकिस्तानी गुप्तचर यंत्रणांच्या दाव्यानुसार, पाकिस्तानात घुसलेले हे ड्रोन अफगाणिस्तानातील कंधार येथील तळांवरून नियंत्रित केले जात होते. या माहितीच्या आधारे, पाकिस्तानच्या वायूसेनेने कंधारमधील तालिबानशी संबंधित तांत्रिक सुविधा आणि शस्त्रास्त्रांच्या डेपोंवर हवाई हल्ले केले आहेत. समा टीव्हीच्या वृत्तानुसार, हे तळ प्रामुख्याने तहरीक-ए-तालिबान पाकिस्तान (TTP) आणि त्यांच्याशी संबंधित लढाऊ गटांकडून वापरले जात होते. अफगाणिस्तानातील तालिबान सरकारने पाकिस्तानच्या या कृतीचा तीव्र शब्दांत निषेध केला आहे.

तालिबानचे प्रवक्ते जबीहुल्लाह मुजाहिद यांनी दिलेल्या माहितीनुसार, पाकिस्तानच्या हल्ल्यांत काबूल आणि पूर्व अफगाणिस्तानात किमान ६ नागरिक ठार झाले असून १५ हून अधिक जण जखमी झाले आहेत. पाकिस्तानी विमानांनी कंधार विमानतळाजवळील काम एअर या खासगी कंपनीच्या इंधन डेपोला टार्गेट केले. हे इंधन नागरी विमान वाहतूक आणि संयुक्त राष्ट्रांच्या (UN) मानवतावादी उड्डाणांसाठी राखीव होते, असा दावा अफगाणिस्तानने केला आहे.

पाकिस्तानी लष्करी चौक्यांवर ताबा मिळवला

या हवाई हल्ल्यांनंतर दोन्ही देशांच्या सीमा सुरक्षा दलांमध्येही चकमकी सुरू झाल्या आहेत. अफगाणिस्तानच्या संरक्षण मंत्रालयाच्या दाव्यानुसार, त्यांच्या सैन्याने पूर्व कुनार आणि नांगरहार प्रांतात पाकिस्तानी लष्करी चौक्यांवर ताबा मिळवला असून १४ पाकिस्तानी सैनिकांना ठार केले आहे. तर इस्लामाबादमधील माहिती मंत्रालयाने तालिबानचा हा दावा पूर्णपणे फेटाळून लावला आहे. अशा प्रकारची कोणतीही घटना घडलेली नाही, असे त्यांनी म्हटले आहे.

या तणावाच्या दरम्यान, वायव्य पाकिस्तानच्या लक्की मारवत जिल्ह्यात रस्त्याच्या कडेला एक भीषण बॉम्बस्फोट झाला. यात ७ पाकिस्तानी पोलीस कर्मचारी ठार झाले आहेत. या घटनेमुळे पाकिस्तानमधील अंतर्गत सुरक्षेचा प्रश्न पुन्हा ऐरणीवर आला आहे. सध्या दोन्ही देशांमधील संवाद खुंटला असून सीमावर्ती भागात हाय-अलर्ट जारी करण्यात आला आहे.