भयंकर स्फोटाने सीरियात खळबळ, फ्रान्सचे राष्ट्राध्यक्ष मॅक्रो थोडक्यात बचावले; 6 जणांचा मृत्यू

सीरियातून मोठी बातमी समोर आली आहे. राजधानी दमास्कसमध्ये एका हॉटेलबाहेर सलग दोन भीषण स्फोट झाले आहे. या हॉटेलमध्ये फ्रान्सचे राष्ट्राध्यक्ष इमॅन्युएल मॅक्रो मुक्कामी होते अशी माहतीही समोर आली आहे. सीरियाचे राष्ट्राध्यक्ष अल शरा यांच्या निमंत्रणावरून मॅक्रो दमास्कस दौऱ्यावर आले असताना हा स्फोट झाला आहे. या बॉम्बस्फटात 6 जणांचा मृत्यू झाला असून सुमारे 20 जण जखमी झाले आहेत. जखमींमध्ये सीरियाच्या पर्यटन मंत्र्यांचाही समावेश असल्याचे बोलले जात आहे. याबाबत सविस्तर माहिती जाणून घेऊयात.

मॅक्रो यांच्या सुरक्षेसाठी असणाऱ्या पोलिसांचा मृत्यू

अल अरेबियाच्या वृत्तानुसार, मॅक्रो हॉटेलमधून बाहेर पडून अल शरा यांची भेट घेण्यासाठी जात असतानाच हॉटेलबाहेर जोरदार स्फोटाचा आवाज झाला. रॉयटर्सच्या माहितीनुसार, ज्या ठिकाणी हा स्फोट झाला तेथे मोठ्या संख्येने लोक होते. या स्फोटातील मृतांमध्ये मॅक्रो यांच्या सुरक्षेसाठी तैनात असलेल्या अनेक पोलिसांचा समावेश आहे. त्यामुळे या भागात मोठी खळबळ उडाली.

इमॅन्युएल मॅक्रो थोडक्यात बचावले

मॅक्रो यांच्या हॉटेलबाहेर झालेला स्फोट कार बॉम्बद्वारे घडवून आणल्याचे समोर आले आहे. लाल रंगाची कार प्रथम हॉटेलबाहेर उभी करण्यात आली आणि त्यानंतर त्यात स्फोट घडवून आणण्यात आला. फ्रान्सच्या राष्ट्राध्यक्ष कार्यालयाकडून अद्याप याबाबत कोणतेही अधिकृत निवेदन जारी करण्यात आलेले नाही. मात्र, स्फोटानंतर मॅक्रो यांनी नियोजितप्रमाणे अल शरा यांची भेट घेतल्याचे सांगितले जात आहे.

पोलिसांकडून स्फोटाच्या घटनेच्या तपासाला सुरुवात

या घटनेनंतर सीरियन पोलिसांनी या प्रकरणाचा तपास वेगाने सुरू केला आहे. अल शरा यांच्या सरकारच्या काळात सीरियाला भेट देणारे मॅक्रो हे युरोपियन संघातील पहिले नेते आहेत. ते दोन दिवसांच्या दौऱ्यावर दमास्कसमध्ये आले होते आणि हा त्यांच्या दौऱ्याचा शेवटचा दिवस होता. दरम्यान, हे दोन्ही स्फोट दमास्कसमधील अतिशय उच्चभ्रू भागात झाले. सलग दोन स्फोटांचे आवाज संपूर्ण परिसरात ऐकू आले. त्यामुळे बराच वेळ या भागात खळबळ उडाली आहे.