इस्रायल आणि इराणमध्ये वाढला तणाव, अमेरिकेने उचललं मोठं पाऊल

हमासचा प्रमुख इस्माईल हनियाच्या हत्येनंतर जगात पुन्हा एकदा तणाव वाढू शकतो. इस्रायल आणि इराण या दोन देशांमध्ये युद्धासारखी परिस्थिती आहे. त्यामुळेच अमेरिकेने मोठा निर्णय घेतला आहे. अमेरिका मध्यपूर्वेत अतिरिक्त लढाऊ विमाने तैनात करणार आहे. इतकंच नाही तर नौदल युद्धनौका देखील तैनात करणार आहे. अमेरिकेने म्हटले आहे की, इराण आणि हमास तसेच हिजबुल्लाह यांच्याकडून मिळालेल्या धमक्या लक्षात घेता अमरिकेने हा निर्णय घेतला आहे.

इराण करु शकतो हल्ला

अमेरिकेचे संरक्षण सचिव लॉयड ऑस्टिन यांनी मध्यपूर्व आणि युरोपमध्ये अतिरिक्त नौदलाचे जहाज आणि विमानं पाठवण्यास मान्यता दिली आहे. जे बॅलिस्टिक क्षेपणास्त्रे खाली पाडू शकतात. याशिवाय अमेरिका येथे लढाऊ विमानांचा अतिरिक्त स्क्वॉड्रनही तैनात करत आहे.

यासंदर्भात पेंटागॉनने एक निवेदन जारी करून म्हटले आहे की, ‘अमेरिकेचे संरक्षण मंत्री लॉयड ऑस्टिन यांनी अमेरिकेला अमेरिकेच्या सैन्याची सुरक्षा सुधारण्यासाठी, इस्रायलचे संरक्षण करण्यासाठी आणि लष्करी समायोजनाच्या आदेशाला सामोरे जाण्यासाठी अमेरिका तयार असल्याची खात्री केली आहे.

यााधी अशी चर्चा होती की, अमेरिका ‘यूएसएस थिओडोर रुझवेल्ट कॅरियर स्ट्राइक ग्रुप’च्या जागी आणखी कोणाला तैनात करेल. मात्र अमेरिकेने या शक्यतांना पूर्णविराम दिला आहे. ऑस्टिनने ‘यूएसएस थिओडोर रुझवेल्ट कॅरियर स्ट्राइक ग्रुप’च्या जागी ‘यूएसएस अब्राहम लिंकन कॅरियर स्ट्राइक ग्रुप’ तैनात करण्याचा निर्णय घेतला आहे. याबाबत पेंटागॉनने सांगितले की, यामुळे जमिनीवर आधारित बॅलिस्टिक क्षेपणास्त्र संरक्षण यंत्रणा अधिक मजबूत होईल.

मध्यपूर्वेत तणाव वाढला

इराणमध्ये हमासचे नेते इस्माईल हनिया यांच्या हत्येनंतर अयातुल्ला अली खामेनी यांनी इस्रायलला धडा शिकवण्याची शपथ घेतली आहे. इस्माईल हनिया इराणचे नवे राष्ट्राध्यक्ष मसूद पेझेश्कियान यांच्या शपथविधी सोहळ्यात सहभागी होण्यासाठी आले होते. यावेळी त्यांनी इराणचे सर्वोच्च नेते अयातुल्ला अली खामेनी यांची भेट घेतली. हमासने म्हटले होते की, बुधवारी तेहरानमधील हनियाच्या घरात स्फोट घडवून आणण्यात आले. हमासने यासाठी इस्रायलला जबाबदार धरले आहे.