Iran-US War Update : भारतासह जगाला संकटात ढकलून अमेरिकेने युद्धातून कमावले 16 अब्ज डॉलर्स, जे मार खातायत त्यांच्याकडूनच उकळणार पैसा

युद्ध अमेरिका-इस्रायलने सुरु केलं. काहीही संबंध नसताना आखाती देश यामध्ये ओढले गेले. इराणच्या हल्ल्यांची मार त्यांना झेलावी लागतेय. या सगळ्यात अमेरिकेने मात्र स्वत:च व्यापारी हित साधलं आहे. महत्वाचं म्हणजे जे मार खातायत त्या देशांकडून अमेरिका पैसा कमावणार आहे. इराण विरुद्ध सुरु असलेल्या युद्धादरम्यान अमेरिकी प्रशासनाने संयुक्त अरब अमीरात, कुवैत आणि जॉर्डन या देशांना अब्जो डॉलर्सची घातक शस्त्रास्त्र विकण्याची परवानगी दिली आहे. इराण विरुद्ध वाढत्या तणावाच्या पार्श्वभूमीवर राष्ट्रपती डोनाल्ड ट्रम्प यांनी हा मोठा निर्णय घेतला आहे. या डिफेन्स डीलमुळे आखाती देशांची एअर डिफेन्स सिस्टिम अजून मजबूत होईल आणि हल्ला करण्याची क्षमता वाढेल.

इराण युद्धाचा सर्वाधिक फटका झेलणाऱ्या आखाती देशांमधील संयु्क्त अरब अमिरात, कुवैत आणि जॉर्डन यांना 16.46 अब्ज डॉलर्सची शस्त्रास्त्र विकण्याची अमेरिकेने परवानगी दिली आहे. मागच्या महिन्यात 28 फेब्रुवारीला अमेरिका-इस्रायलने मिळून इराण विरोधात युद्ध सुरु केलं. व्यापक हवाई हल्ले केले. प्रत्युत्तर म्हणून इराणने सुद्धा मिसाइल आणि ड्रोन्सनी मोठे हल्ले केले. यामुळे आखाती देशांमध्ये जिवीत व वित्तहानी झाली. इराणच्या हल्ल्याचा सामना करताना मोठ्या प्रमाणात शस्त्रास्त्रांचा वापर करावा लागला.

कुठला सर्वात मोठा सौदा?

तात्काळ सैन्य साधनांची गरज आहे हे सिद्ध करण्यासाठी त्यांनी पुरेसे पुरावे दिले आहेत. त्यामुळे अमेरिकन काँग्रेसच्या मंजुरीची आवश्यकता नाही असं अमेरिकेचे परराष्ट्र मंत्री मार्को रुबियो यांच्या कार्यालयाने प्रसिद्ध केलेल्या पत्रकात म्हटलं आहे. कुवेतला 8 अब्ज डॉलरचे एडवांस्ड लोअर टियर एयर एंड मिसाइल डिफेंस सेंसर रडार देण्यात येईल. हाच सर्वात मोठा सौदा आहे. हे रडार उच्च गतीने येणारं मिसाइल, ड्रोन यांना ट्रॅक करणं आणि एअर डिफेन्स सिस्टिमला डेटा देण्यासाठी बनवण्यात आले आहेत. अमेरिकेच्या परराष्ट्र विभागाने ही माहिती दिली.

संयुक्त अरब अमिरातबरोबर किती अब्जचा करार

त्यानंतर संयुक्त अरब अमिरातला 4.5 अब्ज डॉलरचं सैन्य साहित्य विकण्यात येणार आहे. यात बॅलेस्टिक मिसाइल्सना ट्रॅक करणारं रडार आहे. त्याशिवाय 2.1 अब्ज डॉलरची छोटी, मानवरहीत विमानं नष्ट करण्यासाठी बनवण्यात आलेली सिस्टिम, 1.22 अब्ज डॉलरची एअर टू एअर मिसाइल्स आणि 644 मिलियन डॉलरमध्ये F-16 फायटर जेट्ससाठी स्फोटक साहित्यांच्या खरेदीला मंजुरी देण्यात आली आहे.