उन्नाव बलात्कार पीडितेचा कार अपघात, भाजप आमदार सेनगर यांच्यासह 25 जणांविरोधात हत्येचा गुन्हा दाखल

लखनौ: उत्‍तर प्रदेशमधील रायबरेली येथे रविवारी (28 जुलै) उन्‍नाव सामुहिक बलात्कार पीडितेच्या गाडीला एका ट्रकने धडक दिली. यात पीडितेच्या 2 नातेवाईकांचा मृत्यू झाला आहे, तर पीडिता गंभीर जखमी झाली. बलात्कारातील आरोपी भाजप आमदार कुलदीप सेनगर यांनीच आपल्याला मारण्याचा प्रयत्न केल्याचा आरोप पीडितेच्या कुटुंबीयांनी केला आहे. या प्रकरणी आरोपींविरोधात तक्रारही दाखल करण्यात आली आहे.

पीडित कुटुंबाने भाजप आमदार कुलदीप सिंह सेनगर यांच्यासह 10 जणांविरोधात तक्रार दाखल केली आहे. या व्यतिरिक्त अन्य 15 अज्ञातांचाही तक्रारीत समावेश आहे. भाजप आमदार कुलदीप सिंह सेनगर हे उन्‍नाव सामुहिक बलात्कार प्रकरणातील आरोपी आहेत.

उन्नाव येथे सामुहिक बलात्कार झालेल्या पीडितेचे चुलते तुरुंगात आहेत. त्यांना भेटण्यासाठी पीडिता, तिची चुलती, वकील महेंद्र सिंह आणि इतरजण रायबरेली तुरुंगात जात होते. दरम्यान एका ट्रकने त्यांच्या कारला जोराची धडक दिली. यात पीडितेच्या चुलती आणि मावशीचा मृत्यू झाला, तर पीडिताही गंभीर जखमी झाली. जखमींना लखनौ येथील ट्रॉमा सेंटरमध्ये भरती करण्यात आले आहे. हा अपघात रायबरेलीतील अतरुआ गावात झाला. घटनेची माहिती मिळताच पोलिसांनी घटनास्थळावर जाऊन तपास सुरु केला.

विशेष म्हणजे अपघात घडला तेव्हा पीडितेला देण्यात आलेले सुरक्षारक्षक सोबत नव्हते. त्याबद्दलही अनेक प्रश्न उपस्थित केले जात आहेत. समाजवादी पक्षाचे राष्ट्रीय अध्यक्ष आणि उत्तर प्रदेशचे माजी मुख्यमंत्री अखिलेश यादव यांनीही या प्रकरणाचा तपास सीबीआयकडून करण्याची मागणी केली आहे.

पीडितेच्या चुलत्याने दाखल केलेल्या तक्रारीत (FIR) आमदार कुलदीप सिंह सेनगर आणि त्यांचा भाऊ मनोज सेनगर यांच्या नावासह 10 जणांचा समावेश आहे. आयपीसीचे कलम 302, 307, 506, 120बी अंतर्गत हा गुन्हा दाखल करण्यात आला.

आरोपींची नावे

• कुलदीप सिंह सेनगर
• मनोज सिंह सेनगर
• विनोद मिश्र
• हरिपाल मिश्र
• नवीन सिंह
• कोमल सिंह
• अरुण सिंह
• ज्ञानेन्द्र सिंह
• रिंकू सिंह
• एडवोकेट अवधेश सिंह
• 15-20 इतर अज्ञात लोक