मराठवाडा विद्यापीठ नामविस्तार लढ्यातील हुतात्म्यांना श्रद्धांजली

औरंगाबाद : 14 जानेवारी हा मराठवाड्यासाठी विशेष दिवस आहे. आजच्याच दिवशी म्हणजे 1994 ला औरंगाबादमधील मराठवाडा विद्यापीठाचा नामविस्तार करून डॉ. बाबासाहेब आंबेडकरांचं नाव विद्यापीठाला देण्यात आलं. आजचा दिवस मराठवाड्यात मोठ्या उत्साहात साजरा केला जातो. या विद्यापीठाची सध्या डॉ. बाबासाहेब आंबेडकर मराठवाडा विद्यापीठ, औरंगाबाद (BAMU) अशी ओळख आहे.

डॉ. बाबासाहेब आंबेडकरांना मानणारे अनुयायी दरवर्षी 14 जानेवारीला विद्यापीठ प्रवेशद्वारावर येऊन नामविस्ताराच्या लढ्यातील हुतात्म्यांना श्रद्धांजली वाहतात. आजच्या दिवशी 1994 ला मराठवाडा विद्यापीठाला डॉ. बाबासाहेब आंबेडकरांचं नाव देण्यात आलं. मात्र या नामांतरासाठी अनेक जणांना लढा देऊन बलिदानही द्यावं लागलं.

बाबासाहेबांचे मराठवाड्यात वास्तव्य होते. बाबासाहेबांनी औरंगाबादमध्ये मिलिंद महाविद्यालयाची स्थापना केली. मराठवाड्याच्या विद्यार्थ्यांना उच्च शिक्षणासाठी हैदराबादमधील उस्मानिया विद्यापीठात उच्चशिक्षणासाठी जावे लागायचे आणि गरीब मुलांना ते शक्य नसायचे. अखेर 1953 मध्ये मराठवाड्यात पाहिल्या मराठवाडा विद्यापीठाची स्थापना झाली.

1958 पासून या विद्यापीठाला बाबासाहेबांचं नाव द्यावं अशी मागणी सुरु झाली. हळूहळू ही मागणी जोर धरू लागली आणि नामांतराचा लढा सुरु झाला. नामांतरासाठी तब्बल 17 वर्षे लढा बाबासाहेबांच्या अनुयायांनी दिला आणि अखेर 14 जानेवारी 1994 ला मराठवाडा विद्यापीठाचा नामविस्तार करून डॉ. बाबासाहेब आंबेडकर मराठवाडा विद्यापीठ असं नाव देण्यात आलं. तेव्हापासून दर वर्षी बाबासाहेबांचे अनुयायी विद्यापीठ गेटवर येऊन बाबासाहेबांना आणि नामविस्तार लढ्यात बलिदान दिलेल्या हुतात्म्यांना श्रद्धांजली वाहतात.