राजीव बजाज काँग्रेसच्या जवळचे उद्योगपती, त्यांचं मत वैज्ञानिक नाही : सुधीर मुनगंटीवार

चंद्रपूर : “राजीव बजाज काँग्रेसच्या जवळचे उद्योगपती आहेत (Sudhir Mungantiwar on Rajiv Bajaj Statement). त्यांनी मांडलेलं मत वैज्ञानिक नाही. लोकशाहीत त्यांना किंवा इतर कुणालाही मत मांडण्याचा अधिकार आहे”, असं भाजप नेते सुधीर मुनगंटीवार म्हणाले आहेत. याशिवाय “लॉकडाऊन किती उपयोगी ठरलं यावरुन देशातील उद्योगपतींमध्ये दोन गट तयार झाले आहेत, असं म्हणता येणार नाही”, असंही मत त्यांनी मांडलं (Sudhir Mungantiwar on Rajiv Bajaj Statement).

प्रसिद्ध उद्योगपती राजीव बजाज यांनी काल (4 मे) काँग्रेसचे नेते राहुल गांधी यांच्याशी व्हिडीओ कॉन्फरन्सिंगद्वारे झालेल्या चर्चेत आर्थिक स्थितीवर आपली भूमिका स्पष्ट केली होती. भारताने अत्यंत कठोरपणे लॉकडाऊनची अंमलबजावणी केली, यामुळे कोरोना तर आटोक्यात आला नाहीच, पण अर्थव्यवस्थादेखील कोलमडल्याचं मत त्यांनी व्यक्त केलं होतं. त्यांच्या याच भूमिकेवर मुनगंटीवार यांनी प्रतिक्रिया दिली.

मुनगंटीवारांची राज्य सरकारवर टीका

“राज्य कर्मचार्‍यांचे पगार घेण्यासाठी कर्ज काढावे लागणार असल्याची वार्ता आश्चर्यजनक आहे. यामागचं कारणही कळत नाही. महाराष्ट्राची आर्थिक स्थिती सुदृढ आहे. राज्याने आपल्या कर्जाचे नियमित हप्ते दिले असून गेल्या दोन-तीन महिन्यातच ही स्थिती नाजूक झाल्याचे चित्र रंगवणे योग्य नाही”, असं मुनगंटीवार म्हणाले.

“राज्यात विविध विभागांकडे एक लाख कोटी रुपयांच्या ठेवी आहेत. त्यांच्या व्याजावरच राज्याचे अनेक निर्णय धाडसाने घेतले जाऊ शकतात. याशिवाय केंद्रानेही कर्ज मर्यादा वाढवून दिली आहे. त्यातूनही आणखी कर्ज मिळते. राज्य सरकार स्वतः उदासीन वातावरण तयार करत महाराष्ट्राची छवी डागाळत आहे”, अशी टीका सुधीर मुनगंटीवार यांनी केली.

संबंधित बातमी :

लॉकडाऊनमुळे अर्थव्यवस्था उद्ध्वस्त, मात्र लोक बोलायला घाबरत आहेत : राजीव बजाज