टी वन वाघिणीला मारलं, पण तिच्या बछड्यांनी वन विभागाला थकवलं!

टी वन वाघिणीला मारलं, पण तिच्या बछड्यांनी वन विभागाला थकवलं!

यवतमाळ : नरभक्षक टी वन वाघिणीच्या दोन बचड्यांचा शोध घेता घेता वन विभागाची दमछाक झाली आहे. बछड्यांना जेरबंद करण्यासाठी वन विभागाची यवतमाळ जिल्ह्यातील अंजी परिसरात बुधवारी सकाळपासून शोधमोहिम सुरु होती. मध्य प्रदेशातील कान्हा अभयारण्यातील शिवा, पवनपुत्र, चंचलकली, हिमालय या  चार हत्तींवर दोन पशुवैद्यकीय अधिकारी यांचं पथक बसून त्यांच्या साहाय्याने मोहिम यशस्वी करण्याचा प्रयत्न वनविभाग करीत आहे.

अंजी या परिसरातील संपूर्ण 80 एकर परिसरात तार कुंपणसह कापडी कुंपण सुद्धा केले आहे. अंजी परिसरात वनअधिकारी आणि कर्मचारी वगळता कुणालाही जाण्यास बंदी करण्यात आली आहे. या जंगल भागात जाण्यासाठी असलेल्या सर्व रस्ते आणि पांदनरस्ते या ठिकाणी नाकाबंदी करण्यात आली आहे.

2 नोव्हेंबरच्या मध्यरात्री टी वन वाघिणीला ठार केल्यानंतर तिच्या दोन बछड्यांना जेरबंद करण्याची मोहिम राबविण्यात येत आहे. या दोन बछड्यांना आधी स्वतः शिकार करण्यासाठी सहज छोटे भक्ष अनेक ठिकाणी ठेवत एकाच जागेवर ठेवण्यात आलं.

टी वन वाघीण ठार झाल्यानंतर बछड्यांवर लक्ष ठेवण्यात आलं. आता ते दोन बछडे स्वतः शिकार करू शकतात, अशा प्रकारची शाश्वती मिळल्यानंतर आता बछड्यांना 24 डिसेंबरपर्यंत पकडण्यासाठी एक डेडलाईन वरिष्ठ वन अधिकाऱ्यांकडून ठेवण्यात आली आहे. त्यानुसार मुख्य वनसंरक्षक, उपवनसंरक्षक, वन विभागातील अधिकारी, कर्मचारी यांनी अंजी परिसरातील दोन बछडे ( सी1-नर, सी2- मादी ) यांना पकडण्यासाठी बैठक घेतली.

या बैठकीच्या निर्देशानुसार बुधवारी सकाळपासूनच बछड्यांना जेरबंद करण्याची मोहिम आखण्यात आली आहे. या परिसरामध्ये चार हत्तीवरून पाच ते सहा व्हेटर्नरी डॉक्टर यांचे दोन पथक तयार करून जंगलामध्ये शोध घेत त्यांना जेरबंद करण्याचे प्रयत्न सुरू आहेत. या कोअर एरियामध्ये येण्यासाठी मनाई करण्यात आली आहे.

Published On - 10:51 pm, Wed, 19 December 18

Click on your DTH Provider to Add TV9 MARATHI