AC आणि पंखा एकत्र सुरू ठेवल्याने वीजबिल वाढतं का? प्रश्नाचं उत्तर अखेर सापडलंच….

भारतात उन्हाळ्याचा कडाका वाढू लागला आहे. यामुळे आता घराघरांत एसीचा वापर सुरू झाला आहे. एसी सुरू असताना पंखा लावावा की नाही, याबाबत आपल्यापैकी अनेकांच्या मनात संभ्रम असतो. एसी आणि पंखा एकत्र सुरु केला तर वीज बिल वाढते, असे अनेकजण सांगतात. मात्र तज्ज्ञांचे मत काही वेगळेच आहे. एसी आणि पंखा या दोन्हीचा योग्य पद्धतीने वापर केला तर तुम्ही कडक उन्हातही थंड गार हवा मिळू शकते. विशेष म्हणजे यामुळे तुमच्या खिशाला कात्रीही लागणार नाही.

एसी आणि पंखा एकत्र चालवल्यास काय होते?

जेव्हा एसी सुरू असतो, तेव्हा तो खोलीतील तापमान थंड करतो. मात्र, ही थंड हवा जड असल्याने जमिनीच्या दिशेला स्थिरावते. अशा वेळी पंखा मध्यम वेगाने चालवल्यास ती थंड हवा संपूर्ण खोलीत वेगाने पसरण्यास मदत होते. यामुळे खोलीचा प्रत्येक कोपरा लवकर थंड होतो. तसेच एसीला तापमान थंड करण्यासाठी जास्त कष्ट करावे लागत नाहीत.

यामुळे खरोखरच वीज वाचते का?

हो, तुम्हाला हे ऐकून थोडे विचित्र वाटू शकते. पण एसीसोबत पंखा चालवणे वीज बचतीसाठी पूरक ठरते. पंखा स्वतः खूप कमी वीज वापरतो. जेव्हा तुम्ही पंखा चालवता, तेव्हा तुम्ही एसीचे तापमान २४ डिग्री सेल्सिअस ते २६ डिग्री सेल्सिअस दरम्यान सेट करू शकता. पंख्यामुळे हवेचा प्रवाह कायम राहिल्याने २४ अंश तापमानावरही तुम्हाला १८ अंशांसारखा थंडावा जाणवतो. परिणामी, एसीचे कॉम्प्रेसर कमी वेळ चालते आणि वीज बिलात बचत होते.

सर्वोत्तम रिझल्टसाठी काय करावे?

एसी नेहमी २४ ते २५ अंशांच्या आसपास ठेवा. पंख्याचा स्पीड खूप जास्त न ठेवता मध्यम ठेवा, जेणेकरून थंड हवेचे चक्र व्यवस्थित राहील. थंड हवा बाहेर जाऊ नये यासाठी दरवाजे आणि खिडक्यांच्या फटी नीट बंद असल्याची खात्री करा.

पंखा कधी वापरू नये?

जर तुमची खोली खूपच लहान असेल किंवा एसीची हवा थेट तुमच्या अंगावर येत असेल, तर पंख्याची गरज भासणार नाही. तसेच, पंखा अतिशय वेगाने चालवल्यास हवेच्या प्रवाहामुळे थंडावा विखुरला जाऊ शकतो, ज्यामुळे अपेक्षेप्रमाणे आराम मिळणार नाही. त्यामुळे खोलीच्या आकारानुसार पंख्याचा वापर करणे कधीही योग्य ठरते.