Diwali Cleaning: घराच्या साफसफाईसाठी तासन्‌तास घालवू नका! दिवाळीआधी एका दिवसात करा संपूर्ण घर चकाचक

घराच्या साफसफाईसाठी तासन्‌तास घालवू नका! दिवाळीआधी एका दिवसात करा संपूर्ण घर चकाचक

दिवाळीच्या सणासाठी घराघरांत साफसफाईची लगबग सुरू झाली आहे. घराचा प्रत्येक कोपरा स्वच्छ आणि नीटनेटका करण्याकडे अनेकांचा कल असतो. मात्र दोन खोल्या, हॉल, किचन आणि बाथरूम अशा सर्व ठिकाणांची स्वच्छता करायची म्हटल्यावर बराच वेळ जातो. अशावेळी योग्य नियोजन केल्यास अवघ्या एका दिवसात संपूर्ण घराची साफसफाई पूर्ण करता येऊ शकते. यासाठी कुठून सुरुवात करावी आणि कमी वेळेत घर स्वच्छ करण्यासाठी काय करावे, जाणून घ्या.

सर्वात आधी पसारा आवरा

दिवाळीच्या साफसफाईला सुरुवात करण्यापूर्वी घरात विखुरलेल्या वस्तू व्यवस्थित आवरून ठेवा. कपडे, चपला, पुस्तके आणि इतर वस्तू त्यांच्या जागी ठेवा. अनेक दिवसांपासून वापरात नसलेल्या वस्तू वेगळ्या काढा. यामुळे साफसफाई करताना अडथळा येणार नाही आणि वेळेचीही बचत होईल.

दोन्ही बेडरूमची स्वच्छता करा

सर्वप्रथम घरातील दोन्ही बेडरूम स्वच्छ करून घ्या. बेडशीट आणि उशांचे कव्हर बदला. कपाट, टेबल, पंखे, खिडक्या आणि दरवाजांवरील धूळ पुसून काढा. बेड खालील जागा आणि खोलीचे कोपरेही स्वच्छ करा. कपाटातील वस्तू व्यवस्थित लावून शेवटी फरशी पुसून घ्या.

हॉलला द्या नवा लुक

घरात येणाऱ्या पाहुण्यांचे सर्वप्रथम लक्ष हॉलकडे जाते. त्यामुळे हॉलच्या स्वच्छतेकडे विशेष लक्ष द्या. सोफा, कुशन, टेबल आणि टीव्ही कॅबिनेट स्वच्छ पुसून घ्या. मळलेले पडदे धुवून घ्या किंवा बदला. भिंती आणि खिडक्यांवरील धूळ काढा. हॉल अधिक आकर्षक दिसण्यासाठी एखादे छोटे रोप किंवा सजावटीची वस्तू ठेवू शकता.

किचनमधील चिकट तेलकटपणा काढा

घरातील इतर खोल्यांच्या तुलनेत किचन स्वच्छ करणे थोडे अवघड असते. गॅस शेगडी आणि आसपास साचलेला तेलकटपणा आधी स्वच्छ करा. त्यानंतर किचन ओटा, सिंक, टाइल्स आणि कॅबिनेट पुसून घ्या. मसाल्यांचे डबे आणि फ्रिज स्वच्छ करा. एक्सपायरी डेट गेलेले पदार्थ आणि निरुपयोगी डबे बाहेर काढून शेवटी फरशी पुसून घ्या.

बाथरूमच्या स्वच्छतेकडे दुर्लक्ष करू नका

खोल्यांच्या साफसफाईसोबत बाथरूम स्वच्छ करणेही आवश्यक आहे. सर्वप्रथम बाथरूममधील रिकामे डबे आणि नको असलेल्या वस्तू बाहेर काढा. टॉयलेट सीट, वॉश बेसिन, नळ आणि शॉवर क्लीनरच्या मदतीने स्वच्छ करा. टाइल्सवर साचलेली घाण ब्रशने काढा. आरसा आणि दरवाजा पुसून शेवटी फरशी स्वच्छ धुऊन कोरडी होऊ द्या.

शेवटी संपूर्ण घराची स्वच्छता करा

सर्व खोल्या, हॉल आणि किचनची स्वच्छता झाल्यानंतर संपूर्ण घरात पुन्हा एकदा झाडू किंवा व्हॅक्यूम क्लीनर फिरवा. त्यानंतर फरशी पुसून घ्या. दरवाजे आणि खिडक्याही स्वच्छ कापडाने पुसा. घरात ताजी हवा येण्यासाठी खिडक्या उघड्या ठेवा. साफसफाई पूर्ण झाल्यानंतर रांगोळी, फुले आणि पणत्यांनी घर सजवा.