धक्कादायक,परीक्षा केंद्रात विद्यार्थ्यावर कोयत्याने हल्ला; दहावीचा विद्यार्थी गंभीर जखमी

बोर्डाच्या दहावीच्या परीक्षा सुरु असताना शिक्षणाचे माहेर घर म्हटले जाणाऱ्या पुणे जिल्ह्यातील ओतूर येथे धक्कादायक घटना घडली आहे. येथे परीक्षा केंद्रातच एका दहावीच्या विद्यार्थ्यावर कोयत्याने हल्ला करण्यात आल्याने खळबळ उडाली आहे. या प्रकरणात या विद्यार्थ्यांचे प्राण केवळ नशिबाने वाचले आहेत. या घटनेमुळे पुण्यातील गुन्हेगारी पुन्हा चर्चेत आली आहे. आणि पुण्यातील कायदा सुव्यवस्थेचा प्रश्न निर्माण झाला आहे.

जुन्नर तालुक्यातील ओतूर येथील श्री संत गाडगे महाराज विद्यालयात दहावीची एसएससी बोर्डाची परीक्षा सुरू असताना सकाळी अचानक गोंधळ उडाला. एक अल्पवयीन मुलगा थेट परीक्षा केंद्राच्या वर्गात घुसला आणि त्याने दहावीच्या विद्यार्थ्यावर कोयत्याने हल्ला केला.त्यावेळी या विद्यार्थ्याने प्रसंगावधान राखत हा वार हातावर झेलला त्यामुळे या मुलाचे प्राण थोडक्यात वाचले. या मुलाला उपचारासाठी रुग्णालयात दाखल करण्यात आले आहे. या घटनेनंतर परीक्षा केंद्र परिसरात भीतीचे वातावरण निर्माण झाले.

थोडक्यात बचावला

या हल्लेखोराने या दहावीच्या विद्यार्थ्यांच्या मानेवर वार करण्याचा प्रयत्न केला. मात्र या विद्यार्थ्याने प्रसंगावधान राखत तो वार हातावर झेलला. त्यामुळे या विद्यार्थ्यांचे प्राण वाचले. परंतू या घटनेत हा विद्यार्थी मात्र जखमी झाला आहे. घटनेनंतर परीक्षा केंद्र परिसरात भीतीचे वातावरण निर्माण झाले. जुन्या वादातून हा हल्ला झाल्याची प्राथमिक माहिती समोर येत आहे. घटनेची माहिती मिळताच ओतूर पोलिसांनी तातडीने घटनास्थळी धाव घेत आरोपीसह आणखी चार जणांना ताब्यात घेतले. हल्ल्यासाठी वापरलेला कोयताही पोलिसांनी जप्त केला आहे.