दीड वर्षांचं शत्रुत्व संपलं; सावंत बंधू अखेर एकत्र, पुण्यात तानाजीराव-शिवाजीरावांचं मनोमिलन!

सावंत कुटुंबातील मागील दीड वर्षांहून अधिक काळापासून चर्चेत असलेला राजकीय दुरावा अखेर संपुष्टात आला आहे. माजी मंत्री आणि आमदार तानाजीराव सावंत तसेच प्रा. शिवाजीराव सावंत या दोन बंधूंचे पुण्यात अखेर मनोमिलन झाल्याचे दिसून आले आहे. कौटुंबिक आणि राजकीय मतभेदांच्या चर्चांमुळे सावंत परिवारातील दुरावा गेल्या काही काळापासून राजकीय वर्तुळात चर्चेचा विषय ठरला होता.

मिळालेल्या माहितीनुसार, तानाजीराव सावंत आणि प्रा. शिवाजीराव सावंत यांच्यात काही काळापासून राजकीय मतभेद असल्याची चर्चा होती. या मतभेदांमुळे दोन्ही बंधूंच्या राजकीय वाटचालीतही अंतर निर्माण झाल्याचे बोलले जात होते. मात्र पुण्यात झालेल्या भेटीत दोघांनीही जुने मतभेद बाजूला ठेवत एकमेकांशी संवाद साधला आहे. या भेटीमुळे सावंत परिवारातील राजकीय दुरावा आता संपल्याचे स्पष्ट संकेत मिळाले आहेत.

या कौटुंबिक आणि राजकीय पार्श्वभूमीवर प्रा. शिवाजीराव सावंत यांचे चिरंजीव पृथ्वीराज सावंत यांच्या राजकीय भूमिकेचीही चर्चा झाली होती. पृथ्वीराज सावंत यांनी शिवसेना शिंदे गटाला सोडचिठ्ठी देत भाजपमध्ये प्रवेश केला होता. त्यामुळे सावंत परिवारातील राजकीय मतभेद अधिकच चर्चेत आले होते. पृथ्वीराज यांच्या भाजप प्रवेशाकडेही या कौटुंबिक राजकीय घडामोडींच्या संदर्भात पाहिले गेले. गेल्या दीड वर्षाहून अधिक काळ सावंत बंधूंच्या संबंधांबाबत राजकीय वर्तुळात विविध चर्चा सुरू होत्या. यानंतर आता त्यांच्या भेटीचा फोटो व्हायरल होताच राजकीय वर्तुळात मोठ्या चर्चांना उधाण आल्याचे दिसून आहे.

मात्र आता दोन्ही बंधू एकत्र आल्याने या चर्चांना पूर्णविराम मिळाला आहे. पुण्यातील भेटीत झालेले मनोमिलन हे केवळ कौटुंबिक पातळीवरील नव्हे, तर सावंत परिवाराच्या राजकीय भवितव्याच्या दृष्टीनेही महत्त्वाचे मानले जात आहे. तानाजीराव सावंत आणि शिवाजीराव सावंत यांच्यातील मतभेद मिटल्याने सावंत परिवाराची राजकीय ताकद पुन्हा एकत्र येण्याची शक्यता निर्माण झाली आहे. आगामी काळात या मनोमिलनाचा स्थानिक तसेच राज्याच्या राजकारणावर काय परिणाम होतो, याकडे राजकीय वर्तुळाचे लक्ष लागले आहे.