“महायुतीतील धुसफूस चव्हाट्यावर नको”, अमित शाहांकडून भाजप नेत्यांना कठोर सूचना

Amit Shah Mumbai Visit : आगामी विधानसभा निवडणुकांच्या पार्श्वभूमीवर सध्या राजकीय घडामोडींना वेग आला आहे. त्यातच केंद्रीय गृहमंत्री अमित शाह हे दोन दिवस मुंबई दौऱ्यावर आहेत. त्यामुळे महायुतीच्या गोटात विविध राजकीय बैठका, चर्चा होताना दिसत आहेत. आता नुकतंच अमित शाह यांची भाजपच्या प्रमुख नेत्यांसोबत मुंबईत सह्याद्री अतिथीगृह येथे एक बैठक पार पडली. या बैठकीला मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवारही उपस्थित होते. या बैठकीला अमित शाहांनी सर्व नेत्यांना अनेक महत्त्वाच्या सूचना दिल्या आहेत. महायुतीतील धुसफूस चव्हाट्यावर येऊ नये म्हणून जाहीर वाद करणे टाळा, अशी महत्त्वाची सूचना अमित शाहांनी यावेळी दिली.

अमित शाह यांची महायुतीतील महत्त्वाच्या नेत्यांसह भाजप नेत्यांसोबत एक महत्त्वाची बैठक पार पडली. या बैठकीत अमित शाह यांनी महायुतीतील नेत्यांना चांगलेच खडसावले. तसेच त्यांना विधानसभा निवडणुकीच्या पार्श्वभूमीवर काही सूचनाही केल्या आहेत. लोकसभा निवडणुकीतील चुका विधानसभेत करणं टाळा, अशी सूचना अमित शाह यांनी केली.

“महायुतीतील धुसफूस चव्हाट्यावर येऊ नये म्हणून जाहीर वाद करणे टाळा”, असेही अमित शाहांनी यावेळी सांगितले. “महायुतीतील नेत्यांनी संयम ठेवावा. महायुतीने एकजूट असल्याचे चित्र जनतेसमोर जाईल, याची काळजी घ्यावी. लोकसभा निवडणुकीतील चुका विधानसभा निवडणुकीत टाळा. लोकसभेचा फटका विधानसभेत नको. नेत्यांनी संयम ठेवावा, जाहीर वाद करु नका” , अशा महत्त्वाच्या सूचना अमित शाह यांनी दिल्या.

अमित शाह यांच्या दौऱ्याचे नियोजन

दरम्यान आज सोमवारी सकाळी १०.४५ वाजता अमित शाह हे देवेंद्र फडणवीसांच्या सागर बंगल्यावर गणपती बाप्पांचे दर्शन करण्यासाठी जातील. यानंतर ११.१५ च्या सुमारास अमित शाहा हे एकनाथ शिंदेंच्या वर्षा निवासस्थानी गणपतीच्या दर्शनासाठी जातील. त्यानंतर अमित शाह हे दुपारी १२.१० मिनिटांनी लालबागच्या राजाचं दर्शन घेतील. तसेच १२.५० मिनिटांनी अमित शाह हे आशिष शेलार यांच्या वांद्र्यातील सार्वजनिक गणेशोत्सव मंडळाला भेट देतील, असे अमित शाह यांच्या दौऱ्याचे नियोजन आहे.

अमित शाह यांनी काल सह्याद्री अतिथीगृहावर मुक्काम केला होता. अमित शाह यांना भेटण्यासाठी भाजपचे अनेक दिग्गज नेते सह्याद्री अतिथीगृहावर दाखल झाले होते. भाजपचे प्रदेशाध्यक्ष चंद्रशेखर बावनकुळे, मंत्री गिरीश महाजन, मंत्री रविंद्र चव्हाण असे अनेक दिग्गज नेत्यांनी अमित शाहांची भेट घेतली. आता दुपारनंतर पुन्हा एकदा महायुतीच्या नेत्यांची बैठक पार पडणार असल्याचे बोललं जात आहे. या बैठकीत महायुतीच्या जागावाटपाबद्दल निर्णय होणार असल्याचे बोललं जात आहे.