गोड बातमी! अमित ठाकरे यांना कन्यारत्न, दुसऱ्यांदा झाले बाबा

amit thackeay and Mitali Borude

Amit Thackeray : राजकीय नेते सामान्यांच्या विकासासाठी, लोकांचे जीवन आनंददायी व्हावे यासाठी सतत प्रयत्नरत असतात. काही नेते मंडळी तर कायम जनहितासाठी झगडत असतात. मनसेचे नेते अमित ठाकरे हेदेखील कायम मराठीचा पुरस्कार करून लोकांसाठी वेगवेगळा लढा देत असतात. सामान्यांचे जीवनमान कसे उंचावेल यासाठी त्यांचा प्रयत्न असतो. दरम्यान याच अमित ठाकरे यांच्या घरी गोड बातमी आली आहे. अमित ठाकरे दुसऱ्यांदा बाबा झाले आहेत. अमित ठाकरे हे मनसेचे प्रमुख राज ठाकरे यांचे पुत्र आहेत. आता अमित ठाकरे दुसऱ्यांदा बाबा झाल्याने राज ठाकरे हेदेखील दुसऱ्यांदा आजोबा झाले आहेत. अमित ठाकरेंना कन्यारत्न झाले आहे.

अमित ठाकरेंना पहिला मुलगा

अमित ठाकरे यांच्या पत्नीचे नाव मिताली बोरुडे असे आहे. त्यांचे लग्न 27 जानेवारी 2019 रोजी झाले होते. अमित ठाकरे आणि मिताली बोरुडे यांना पहिला मुलगा झाला. त्यांच्या मुलाचे नाव कियान असे आहे. आता या दाम्पत्याला दुसरी मुलगी झाली आहे. सध्या राज ठाकरे यांच्या शीवतीर्थ बंगला आनंदात आहे.

अमित ठाकरेंची राजकीय कारकीर्द

दरम्यान, अमित ठाकरे हे राजकारणात सक्रिय आहेत. त्यांनी 2024 सालची विधानसभा निवडणूक माहीम या विधानसभा मतदारसंघातून लढवली होती. ही जागा जिंकण्यासाठी मनसेने चांगलाच जोर लावला होता. परंतु त्यांचा या जागेवरून पराभव झाला होता. या जागेवर उद्धव ठाकरे यांच्या शिवसेनेचे महेश सावंत हे विजयी झाले होते. आमदार होण्यासाठी अमित ठाकरे यांनी या मतदारसंघात पूर्ण ताकदीने प्रचार केला होता. परंतु त्यांना यात यश आले नाही. प्रचारात अमित ठाकरे यांच्यासोबत त्यांची पत्नी मिताली बोरुडे यादेखील दिसल्या होत्या. महिला मतदारांना आकर्षित करण्यासाठी मिताली बोरुडे यांनीही प्रचार केला होता. परंतु अमित ठाकरे निवडणूक जिंकू शकले नव्हते. पंतप्रधान नरेंद्र मोदी यांचा फोटो हटवल्याने अमित ठाकरे आता पुन्हा नव्याने चर्चेत आले आहेत. पुण्याच्या तंत्रनिकेतन महाविद्यालयात छत्रपती शिवाजी महाराज यांच्या बाजूला मोदी यांचा फोटो लावल्याने अमित ठाकरेंनी संताप व्यक्त केला होता.