भोंदू खरातचा मामेभाऊ पहिल्यांदाच समोर, केलेल्या विधानाने सगळेच चकित, म्हणाले, ज्या वेळी…

भोंदूबाबा अशोक खरातचे काळे कारनामे समोर येत आहेत. अशोक खरातने अनेक महिलांनी लैंगिक छळ केल्याचे समोर आले आहेत. खरातवर आतापर्यंत 7 गुन्हे दाखल करण्यात आले आहेत. त्याची एसआयटीकडून आणि पोलिसांकडून कसून चौकशी सुरू आहे. खरातने भोंदुगिरी करून कोट्यवधींची संपत्ती जमवली होती अशी माहितीही समोर आली आहे, तसेच त्याने नरबळी दिल्याचाही आरोप होत आहे. अशातच आता खरातच्या मामेभावाने या प्रकरणावर भाष्य केले आहे. अशोक खरातच्या कुटुंबात कोण कोण आहे? तसेच त्याचे आणि नातेवाईकांचे संबंध कसे होते याचीही माहिती समोर आली आहे. अशोक खरातच्या मामेभावाने काय म्हटले ते जाणून घेऊयात.

अशोक खरातच्या मामेभावाची प्रतिक्रिया

शिर्डी जवळील काकडी हे अशोक खरातचे आजोळ आहे. अशोक खरातच्या मामेभावाने म्हटले की, ‘अशोक खरात याला दोन आई. पहिली आई डोंगरगावची तर दुसरी आई आमची आत्या या काकडी गावची आहे, आमच्या आत्याच वय 96 वर्षे आहे. आमचा संबंध केवळ कौटूंबिक कार्यक्रमात यायचा. खरात हा खूप कमी वेळी आजोळी यायची. पहिल्या आईला पाच मुले तर दुसरी आई आमची आत्या यांना दोन मुले. ते सर्व कहांडळवाडी येथे राहतात.

अशोक खरातच्या मामेभावाची मोठी मागणी

पुढे अशोक खरात बाबत दररोज जे खुलासे होत आहेत याबाबत बोलताना मामेभाऊ म्हणाले की, ‘मीडियावर ज्या गोष्टी समोर आल्या त्याबाबत आम्हाला माहिती नाही. आम्ही हे मीडीयावर पहिल्यांदाच पाहतोय. ज्यावेळी आत्याचे लग्न झाले त्यावेळी सर्व शेतकरी समाज होता त्यामुळे आमच्या आजोबांनी लग्नाचा निर्णय घेतला. काकडी मध्ये खरेदी केलेल्या जमिनीविषयी आम्हाला कल्पना नव्हती. झालेल्या प्रकाराबाबत आता SIT चौकशी सुरू आहे, निष्पक्षपणे चौकशी झाली पाहिजे अशी आमची मागणी आहे.’

अशोक खरात भोंदू बाबा कसा बनला?

अशोक खरातच्या परिचयातील व्यक्ती राजेंद्र खताळे यांनी सांगितले की, ‘खरातचे कुटुंबाशी वाद झाले होते त्यावेळी तो घर सोडून गेला होता. तो दहावी नापास असून कॅप्टन नाही. त्याची एक एसटीडी देखील होती, तिथून त्याच्या भोंदूगिरीची सुरुवात झाली. तो प्लॉटिंग व्यवसाय करू लागला, त्यानंतर लग्न जुळवू लागला, त्यातून नंतर भविष्य सांगायला लागला. त्याने एकदा गॅस टाकी देखील चोरली होती. एक लग्न जुळवण्याच्या वेळी त्याचे माझे संबंध आले, मात्र मी त्याला नाही म्हणून सांगितले. तो भोंदू असल्याचा मला माहित होतं. त्याच्यावर कठोर कारवाई झाली पाहिजे.’